- మన్యంలోని మారుమాల గ్రామస్తుల వేడుకోలు
- ఇటీవల ఐటీడీఏకు 10 బైక్ అంబులెన్స్ లు పంపిన ప్రభుత్వం
- అత్యవసరంగా మందులు పంపేందుకు ఓకే.. పేషెంట్ను తరలించేందుకే ఇబ్బంది
- సమస్యను ఉన్నతాధికారుల దృష్టికి తీసుకెళ్లామంటున్న వైద్యాధికారులు
భద్రాచలం, వెలుగు : భద్రాచలం మన్యంలో దారిలేని మారుమూల అటవీ గ్రామాల్లో అత్యవసర వైద్యం కోసం బైక్ అంబులెన్స్ లు కాదు.. ఫీడర్ అంబులెన్స్ కావాలని స్థానికులు ప్రభుత్వాన్ని కోరుతున్నారు. ఇటీవల ఐటీడీఏకు ప్రభుత్వం 10 బైక్ అంబులెన్స్ లను కేటాయించింది. వీటితో కొండలు, గుట్టలు, వాగుల ఆవల ఉన్న గ్రామాలకు వెళ్లి పేషెంట్కు చికిత్సలు అందిస్తారు.
కానీ పేషెంట్ను సమీప పీహెచ్సీకి తీసుకురాలేని పరిస్థితి ఉంటుంది. ఏపీ, ఛత్తీస్గఢ్ రాష్ట్రాల్లో వాడుతున్న ఫీడర్ అంబులెన్స్ తరహా వాటిని భద్రాద్రికొత్తగూడెం జిల్లా వైద్య,ఆరోగ్యశాఖ ప్రభుత్వాన్ని అడిగింది. కానీ బైక్ అంబులెన్స్లు ఇచ్చారు. ఫీడర్ అంబులెన్స్ లో ఒక పేషెంట్ పడుకునేలా చిన్న క్యాబిన్, ఆక్సిజన్ సిలిండర్, 12 రకాల వైద్య పరికరాలు, అత్యవసర మందులు ఉంటాయి. అవసరమైతే పేషెంట్ను అందులోనే దగ్గరలో ఆసుపత్రికి తీసుకురావొచ్చు.
75 మారుమూల గ్రామాల కోసం...
భద్రాచలం ఐటీడీఏ పరిధిలోని చర్ల, సత్యనారాయణపురం, దుమ్ముగూడెం, పర్ణశాల, మంగపేట, ఉల్వనూరు,ఆళ్లపల్లి, గుండాల, గుమ్మడివల్లి, పినపాక పీహెచ్సీల పరిధిలో 75 మారుమూల గ్రామాలకు పెద్ద వాహనాలు వెళ్లడానికి మార్గం లేదు. మధ్యలో వాగులు, రహదారి సౌకర్యం లేని ఈ గ్రామాల్లో గిరిజనుల కోసం ఇటీవల బైక్ అంబులెన్స్ లను ప్రభుత్వం కేటాయించింది.
ఇవి ఇటీవల మేడారం జాతరలో భక్తుల వద్దకు వేగంగా వైద్యసిబ్బంది చేరుకునేందుకు ప్రభుత్వం ఉపయోగించింది. 40 బైక్లు ఉండగా అందులో 10 బైక్లను భద్రాచలం ఐటీడీఏకు వైద్యారోగ్యశాఖ ప్రపోజల్స్ మేరకు పంపించారు. అవెంజర్స్ ఫస్ట్ రెస్పాండర్ అంబులెన్స్ అని పిలిచే ఈ బైకులో కేవలం ఫస్ట్ ఎయిడ్ బాక్స్ మాత్రమే ఉంది. దీనికి ఒక మైక్ ఉంది. రోగిని పరీక్షించి, మందులు మాత్రమే ఇస్తారు. పేషెంట్ను అత్యవసరంగా తరలించే వీలు లేదు.
జట్టీలకు స్వస్తి పలకాలనే ఉద్దేశ్యంతో...
ఏజెన్సీ ప్రాంతాల్లో వర్షాలు, వరదల సమయంలో ఆదివాసీలు వైద్యశాలకు రావాలంటే జట్టీలే దిక్కు. మంచాన్ని తిరగేసి కర్రలు కట్టి అందులో పేషెంట్ను పడుకోబెట్టి ఆసుపత్రికి తీసుకొస్తారు. పెద్ద వాహనాలు వెళ్లడానికి రోడ్డు సౌకర్యం లేకపోవడంతో ఈ పరిస్థితి ఏర్పడుతోంది. వీటికి స్వస్తి పలకాలనే ఉద్దేశ్యంతో వైద్య,ఆరోగ్యశాఖ ఏపీ, ఛత్తీస్గఢ్ తరహాలో ఫీడర్ అంబులెన్స్ లు కావాలంటూ ప్రపోజల్స్ పెట్టారు. గర్భిణులు, అత్యవసర వైద్యం అవసరమయ్యే రోగులను ఇందులో తీసుకురావడానికి వీలుగా ఇవి ఉండాలని కోరారు. కానీ మేడారం జాతరలో ఉపయోగించిన బైక్ అంబులెన్స్ లు ఇవ్వడంతో ప్రభుత్వం మరోసారి ఆలోచించి పీడర్ అంబులెన్స్లు ఇచ్చేలా చూడాలని పలువురు కోరుతున్నారు.
పీవో దృష్టికి తీసుకెళ్తాం
బైక్ అంబులెన్స్ ల విషయం ఐటీడీఏ పీవో దృష్టికి తీసుకెళ్తాం. వచ్చిన 10 బైక్లను మోడిఫై చేసి వినియోగించుకునేలా చర్యలు చేపడతాం. ఏపీ, ఛత్తీస్గఢ్ తరహాలో ఫీడర్ అంబులెన్స్ లు కావాలని ప్రపోజల్స్ ఇచ్చాం. ఆఫీసర్ల సూచనల మేరకు వాటిని వినియోగిస్తాం.
డాక్టర్చైతన్య, మాతా,శిశు విభాగం, జిల్లా కో ఆర్డినేటర్
