- బ్యాంకు సిబ్బందితో కలిసి రూ.40 కోట్లకు టోకరా
- ముగ్గురి అరెస్టు, నిందితుల్లో బ్యాంకు మేనేజర్, సర్వీస్ డెలివరీ మేనేజర్
- కీలక నిందితుడిగా ఉన్న ఏపీ కాంగ్రెస్ నేత కూడా అదుపులోకి
- ఆదిత్య బిర్లా హౌసింగ్ ఫైనాన్స్ అకౌంట్ నుంచి నిధులు బదిలీ
గచ్చిబౌలి, వెలుగు: ఆదిత్య బిర్లా హౌసింగ్ ఫైనాన్స్ అకౌంట్లోకి లాగిన్ అయ్యి రూ. 40 కోట్లు కొట్టేశారు. శంషాబాద్ ఇండస్ ఇండ్ బ్యాంకు మేనేజర్, సర్వీస్ డెలివరీ మేనేజర్, ఏపీ కాంగ్రెస్ నేత షేక్ బషీద్ ఈ మోసానికి పాల్పడ్డారు. సైబరాబాద్ ఎకనామిక్ అఫెన్సెస్ వింగ్ (ఈఓడబ్ల్యూ) అధికారులు వీరిని అరెస్టు చేశారు. ఈఓడబ్ల్యూ డీసీపీ ప్రసాద్ తెలిపిన వివరాల ప్రకారం.. జూబ్లీహిల్స్లో నివాసం ఉంటున్న కాంగ్రెస్ నేత షేక్ బషీద్ వ్యాపారి. ఇటీవల జరిగిన లోక్సభ ఎన్నికల్లో ఏపీలోని రాజంపేట లోక్సభ నియోజకవర్గం నుంచి కాంగ్రెస్ తరపున పోటీచేశాడు. జూబీహిల్స్కు చెందిన వ్యాపారి ఉదయ్కుమార్రెడ్డికి చెందిన ఇంటిని కొనుగోలు చేసేందుకు బషీద్ అతనితో ఒప్పందం చేసుకున్నాడు.
డబ్బుల కోసం శంషాబాద్లోని ఇండస్ ఇండ్ బ్యాంకును సంప్రదించాడు. ఈ బ్యాంకులో బండ్లగూడ జాగీర్ అభ్యుదయ నగర్ కాలనీకి చెందిన కనుగుల రామస్వామి మేనేజర్గా, శంషాబాద్కు చెందిన రాజేష్ సర్వీస్ డెలివరీ మేనేజర్గా పనిచేస్తున్నారు. తన ప్లాన్ లో భాగంగా రామస్వామితో బషీద్ డీల్ కుదుర్చుకుని రూ.కోటి ఇచ్చాడు. ఆ తర్వాత ఉదయ్కుమార్రెడ్డితో బ్యాంకులో అకౌంట్ ఓపెన్ చేయించాడు. ఆదిత్య బిర్లా హౌసింగ్ ఫైనాన్స్ లిమిటెడ్ కంపెనీ అకౌంట్లోకి ఎంటర్ అయ్యేందుకు రామస్వామి.. రాజేష్ వద్ద లాగిన్ ఐడీ తీసుకున్నాడు. ఈనెల 12న బషీద్.. ఆదిత్య బిర్లా ఫైనాన్స్ లిమిటెడ్ కంపెనీ అకౌంట్ నుంచి రూ.40 కోట్లను ఉదయ్కుమార్రెడ్డి అకౌంట్కు బదిలీ చేయించాడు.
ఆ తర్వాత ఉదయ్కుమార్రెడ్డి అకౌంట్లో రూ.10 కోట్లు ఉంచి, మిగిలిన డబ్బులను బషీద్ తనకు తెలిసిన మరో 7 అకౌంట్లకు రామస్వామితో బదిలీ చేయించాడు. ఈ డబ్బుతో రెండు టయోటా ఫార్చ్యునర్ కార్లు కొన్న బషీద్.. ఒక కారును రామస్వామి వద్ద, మరో కారును ఉదయ్కుమార్రెడ్డి వద్ద పెట్టాడు. అయితే.. చెక్కులు, ఆర్టీజీఎస్ ఫాంలేకుండానే ఆదిత్య బిర్లా హౌసింగ్ ఫైనాన్స్ లిమిటెడ్ నుంచి రూ.40 కోట్లు బదిలీ అయినట్లు గుర్తించిన ఇండస్ఇండ్ బ్యాంకు జోనల్ హెడ్ ఆపరేషన్స్ అధికారి మణికందన్ రామనాథన్.. ఈనెల 19న శంషాబాద్ బ్యాంకుమేనేజర్, సర్వీస్ డెలివరీ మేనేజర్, కస్టమర్ ఉదయ్కుమార్రెడ్డిపై సైబరాబాద్ ఎకనామిక్ అఫెన్సెస్ వింగ్కు ఫిర్యాదుచేశాడు.
అధికారులు కేసు నమోదు చేసి దర్యాప్తు చేపట్టగా వాస్తవాలు వెలుగులోకి వచ్చాయి. దీంతో ఈ కేసులో ప్రధాన నిందితులుగా ఉన్న బ్యాంకు మేనేజర్ రామస్వామి, సర్వీస్ డెలివరీ మేనేజర్ రాజేష్ను అరెస్టు చేశారు. షేక్ బషీద్ ను ఢిల్లీలో అదుపులోకి తీసుకొని హైదరాబాద్కు తరలించారు. అలాగే వివిధ బ్యాంకులో ఉన్న రూ. 23 కోట్లను బ్లాక్ చేసి, బషీద్ కొన్న కార్లను స్వాధీనం చేసుకున్నారు. కాంగ్రెస్ నేత షేక్ బషీద్పై హైదరాబాద్, జూబ్లీహిల్స్, పంజాగుట్ట, బంజారా హిల్స్, బోయిన్పల్లి, నార్సింగి, వికారాబాద్ జిల్లాలోని మోమిన్పేట పోలీస్ స్టేషన్లో 10 చీటింగ్ కేసులు ఉన్నాయి.
