నెల రోజులుగా లోక్సభ ఎన్నికలు జరుగుతున్నాయి.. అధికార బీజేపీ, ప్రతిపక్ష కాంగ్రెస్ మధ్య పోటీ నువ్వా–నేనా అన్నట్లు ఉంది. అందువల్ల ఏ పార్టీ గెలుస్తుందో ఊహించలేని పరిస్థితి. నరేంద్ర మోడీ మరోసారి ప్రధాని అవుతారా? లేక యూపీఏ–3 ప్రభుత్వం ఏర్పడుతుందా అనేది అంతు చిక్కట్లేదు. అన్ని వర్గాల ప్రజల్లోనూ ఇదే సస్పెన్స్ నెలకొంది. ఈ గందరగోళం సర్వీస్ సెక్టార్పై నెగెటివ్ ఎఫెక్ట్ చూపినట్లు ఇటీవల ఒక సర్వేలో తేలింది.
ప్రస్తుతం కొనసాగుతున్న సాధారణ ఎన్నికల్లో ప్రజలు ఏ పార్టీకి పట్టం కడతారో అంత ఈజీగా అర్థం కావట్లేదు. బిజినెస్మెన్ సైతం దీన్ని సరిగ్గా అంచనా వేయలేకపోతున్నారు. దీంతో వాళ్లు తమ వ్యాపారానికి సంబంధించిన కొన్ని నిర్ణయాలను ఎలక్షన్ రిజల్ట్ వచ్చే వరకు వాయిదా వేస్తున్నారు. కొత్తగా బిజినెస్ పెట్టాలనుకునేవాళ్లు, ఇప్పటికే ఉన్న వ్యాపారాన్ని పెంచాలనుకునేవాళ్లు కేంద్రంలో ఏ పార్టీ ప్రభుత్వం వస్తుందో చూద్దామని ఆగుతున్నారు. ఈ ప్రభావం సేవల రంగంలో కొట్టొచ్చినట్లు కనిపిస్తోంది.
దేశంలో సర్వీస్ సెక్టార్ అభివృద్ధి నెమ్మదించింది. గత ఏడు నెలలతో పోల్చితే ఏప్రిల్లో మందగించింది. ‘ది నిక్కీస్/ఐహెచ్ఎస్ మార్కిట్ సర్వీసెస్ పర్చేజింగ్ మేనేజర్స్’ ఇండెక్స్ 52 పాయింట్ల నుంచి 51కి తగ్గింది. ఈ సూచిక ఇంత తక్కువ నమోదవటం సెప్టెంబర్ నుంచి ఇదే తొలిసారి. గ్రోత్ని తెలిపే ఈ ఇండెక్స్ వరుసగా 11వ నెల కూడా 50 మార్క్ పైనే ఉండటం విశేషం. ఎన్నికల ఫలితాలు వచ్చి, కొత్త సర్కారు ఏర్పడేటప్పటికి మే నెల పూర్తవుతుంది. అప్పటికీ ఇదే పరిస్థితి కొనసాగితే ఈ మార్కు 49కి పడిపోతుందేమోననే ఆందోళన నెలకొంది.
గడచిన పది నెలల్లో ఫారిన్ డిమాండ్ వేగంగా వృద్ధి చెందినా కొత్త బిజినెస్లను ట్రాక్ చేసే ఒక సబ్ ఇండెక్స్ మాత్రం ఏడు నెలల్లో ఎన్నడూ లేనంతగా ఏప్రిల్లో పడిపోయింది. వివిధ సంస్థలు తమ ప్రొడక్టుల రేట్లను ఇటీవల పెంచటంతో మార్చిలో 52.3 పాయింట్ల వద్ద ఉన్న ఈ ఇండెక్స్ ఏప్రిల్లో 51.2 పాయింట్లకు తగ్గింది. ఇన్ఫ్లేషన్ ప్రస్తుతం మీడియం టర్మ్ టార్గెట్ వద్దే ఉండటం, ఎన్నికలకు ముందు ఆర్బీఐ ప్రధాన వడ్డీ రేట్లను రెండు సార్లు తగ్గించటం వల్ల ద్రవ్యోల్బణం గతంతో పోల్చితే ఇప్పుడు తక్కువగానే ఉంది.
ఎకానమీ గ్రోత్ పడిపోయిన మ్యానిఫ్యాక్చరింగ్, సర్వీస్ సెక్టార్లలో ద్రవ్యోల్బణ ఒత్తిళ్లు కూడా లేకపోవటం పర్చేజ్ రేట్ మరింత తగ్గటానికి దారితీస్తాయి. మార్చితో పోల్చితే ఏప్రిల్లో ఇండస్ట్రియల్ ఔట్పుట్లో పెరుగుదల కూడా నిదానంగానే సాగింది. ఫలితంగా కాంపోజిట్ పీఎంఐ గత ఏడు నెలల్లో లేనంత తక్కువగా 51.7 వద్ద నిలిచింది. కొత్త ప్రభుత్వం ఎలాంటి నిర్ణయాలు తీసుకుంటుందో తెలియని పరిస్థితుల్లోనూ వివిధ కంపెనీలు పాజిటివ్గానే ఆలోచిస్తూ గత నెలలో రిక్రూట్మెంట్లను పెంచటం సంతోషించాల్సిన విషయం. – ‘ది వైర్’ సౌజన్యంతో
ఎన్నికలే కారణం
ఇండియాలో ప్రైవేట్ సెక్టార్ ఎకానమీ గ్రోత్ స్లోగానే ఉండొచ్చని భావిస్తున్నారు. అయినప్పటికీ లోక్సభ ఎన్నికల వల్ల తలెత్తిన ఆటంకాలే ఆర్థిక రంగంలో అభివృద్ధి తగ్గటానికి ప్రధాన కారణం. వ్యాపార సంస్థలు సహజంగానే కేంద్రంలో ఏ ప్రభుత్వం వస్తుందా, ఎలాంటి విధానాలను అమలు చేస్తుందా అని ఎదురుచూస్తాయి. బిజినెస్ డెవలప్మెంట్‌కి అనుకూల నిర్ణయాలు తీసుకునే గవర్నమెంట్ రావాలని కోరుకుంటాయి. అందులో తప్పేమీ లేదు.
– పాల్లియానా డి లిమా, ప్రిన్సిపల్ ఎకనమిస్ట్, ఐహెచ్ఎస్ మార్కిట్
