- ఓటమి తర్వాత డీలాపడిన బీఆర్ఎస్ వలసలు, ఎమ్మెల్యేల తీరుతో పడిపోయిన గులాబీ గ్రాఫ్
- బీజేపీ నుంచి బరిలో కొండా విశ్వేశ్వర్ రెడ్డి
- ఇంకా అభ్యర్థులను ప్రకటించని కాంగ్రెస్, బీఆర్ఎస్
- పోటీకి ససేమిరా అంటున్న సిట్టింగ్ ఎంపీ రంజిత్ రెడ్డి
- సీఎం ఇన్చార్జిగా ఉండడంతో గెలుపుపై కాంగ్రెస్ ధీమా
- మోదీ ఛరిష్మా, కొండా క్యాడర్పై బీజేపీ ఆశలు
హైదరాబాద్, వెలుగు: చేవేళ్ల పార్లమెంట్ నియోజకవర్గంలో ఈసారి కాంగ్రెస్, బీజేపీ మధ్యే ప్రధాన పోటీ కనిపిస్తోంది. అసెంబ్లీ ఎన్నికల తర్వాత ఎమ్మెల్యేలపరంగా చూసినప్పుడు బీఆర్ఎస్, కాంగ్రెస్ మధ్య నువ్వా, నేనా అనే పరిస్థితి ఉన్నప్పటికీ అధికారం కోల్పోవడంతో గులాబీ గ్రాఫ్ క్రమంగాపడిపోతోంది. బీఆర్ఎస్ నుంచి కాంగ్రెస్లోకి భారీ వలసలు కొనసాగుతుండడం, గెలిచిన ఎమ్మెల్యేలు సీఎంను కలవడం లాంటి చర్యలతో ఆ పార్టీ ఆత్మరక్షణలో పడింది. మరోవైపు బీజేపీ నుంచి మాజీ ఎంపీ కొండా విశ్వేశ్వర్ రెడ్డి పేరు ఖరారు కావడంతో ఆ పార్టీ ప్రచారంలో దూసుకెళ్తోంది. చేవెళ్ల పార్లమెంట్ కాంగ్రెస్ ఇన్చార్జిగా స్వయంగా సీఎం ఉండడంతో ఆ పార్టీ సైతం దూకుడు మీద ఉంది. మాజీ మంత్రి, ఎమ్మెల్సీ పట్నం మహేందర్ రెడ్డి భార్య వికారాబాద్ జిల్లా జడ్పీ చైర్ పర్సన్ సునీతారెడ్డికే టికెట్ఖాయమని తెలుస్తోంది. ఆమెకు టికెట్ ఇస్తే ఈ రెండు పార్టీల మధ్య ఢీ అంటే ఢీ అనే పరిస్థితే ఉండనుంది. ఇక సిట్టింగ్ ఎంపీగా ఉన్న రంజిత్రెడ్డి ఈ సారి పోటీ చేయబోనని బీఆర్ఎస్ హైకమాండ్కు స్పష్టం చేయడంతో క్యాడర్ అయోమయంలో పడింది.
దూకుడు మీద కాంగ్రెస్, బీజేపీ..
అభ్యర్థుల విషయంలో క్లారిటీ ఉన్న బీజేపీ, కాంగ్రెస్పార్టీలు గ్రౌండ్ లెవెల్లో ప్రచారాన్ని స్పీడప్ చేశాయి. వారం కింద చేవేళ్లలో ప్రజాగర్జన పేరుతో సీఎం రేవంత్ రెడ్డి బహిరంగ సభ నిర్వహించి క్యాడర్ను సమాయాత్తం చేశారు. ఆయన స్వయంగా చేవెళ్ల పార్లమెంట్ నియోజకవర్గానికి ఇన్చార్జీగా ఉండ డంతో గెలుపును పార్టీ ప్రతిష్టాత్మకంగా తీసుకుంది. ఇప్పటికే అధికారంలోకి వచ్చిన జోష్లో ఉన్న కాంగ్రెస్లీడర్లు నాలుగు గ్యారంటీల అమలుతో విజయంపై ధీమాగా ఉన్నారు. పాలనలో సీఎం రేవంత్ రెడ్డి తనదైన మార్క్ చూపుతుండడంతో క్యాడర్లో మరింత ఉత్సాహం పెరిగింది. బీజేపీ కూడా ఇప్పటికే నియోజకవర్గంలో విజయసంకల్పయాత్ర పూర్తి చేసింది. ప్రస్తుతం బీజేపీ నుంచి పోటీ చేయబోతున్న కొండా విశ్వేశ్వర్రెడ్డికి గతంలో ఇక్కడ ఎంపీగా చేసిన అనుభవం ఉంది. ఆయన బీఆర్ఎస్తో పాటు కాంగ్రెస్లోనూ పని చేశారు. అప్పటి నుంచి ఆయన వెంట నడుస్తున్న క్యాడర్ను కాపాడుకుంటూ వస్తున్నారు. బీజేపీకి సైతం సంస్థాగత బలం ఉండడం కలిసి వచ్చే అంశంగా చెప్పుకోవచ్చు. దీనికితోడు మోదీ హవా , రామమందిర నిర్మాణం తమను గెలిపిస్తాయని బీజేపీ నేతలంటున్నారు. 2019 ఎన్నికల్లో ఇక్కడ బీజేపీ నుంచి పోటీ చేసిన అభ్యర్థి బి.జనార్దన్రెడ్డికి 2లక్షలకుపైగా ఓట్లు వచ్చాయి. ఆయన అంత బలమైన అభ్యర్థి కాకపోయినా మోదీ చరిష్మానే ఇందుకు కారణమని, దీనికి ఇప్పుడు కొండా బలం తోడైతే గెలుపు ఖాయమనే ధీమాతో ఉన్నారు.
రేసులో వెనుకబడిన బీఆర్ఎస్..
రాష్ట్రంలో కాంగ్రెస్ అధికారంలోకి వచ్చిన తర్వాత చాలా మంది నేతలు బీఆర్ఎస్ను వీడుతున్నారు. అసెంబ్లీ ఎన్నికలకు ముందు ఇతర పార్టీల నుంచి బీఆర్ఎస్ లో చేరిన వారంతా ఇప్పుడు కాంగ్రెస్, బీజేపీ వైపు చూస్తున్నారు. మున్సిపాలిటీలు, కార్పొరేషన్లలో అవిశ్వాస తీర్మానాలు ప్రవేశపెడుతుండడం, అన్ని స్థానాలు కాంగ్రెస్ ఖాతాలో పడుతుండడం బీఆర్ఎస్కు మైనస్గా మారింది. మేయర్లు, చైర్మన్లు కూడా కాంగ్రెస్ పార్టీలో చేరుతున్నారు. కొందరు బీఆర్ఎస్ఎమ్మెల్యేలు తమ అనుచరులను ముందుగా పంపుతున్నారని, ఎన్నికల నాటికి వారు కూడా కాంగ్రెస్లో చేరతారన్న ప్రచారం జరుగుతోంది. రంగారెడ్డి జిల్లాలో బలంగా ఉన్న పట్నం మహేందర్ రెడ్డి, తీగల కృష్ణారెడ్డి లాంటి నేతలు కూడా కాంగ్రెస్ గూటికి చేరారు. ఈ పార్లమెంట్ నియోజకవర్గంలో గెలిచిన బీఆర్ఎస్ ఎమ్మెల్యేలతో పాటు ఓడిన వారు కూడా యాక్టివ్ గా లేరు.
ఎమ్మెల్యేల తీరుతో మారిన సీన్..
చేవెళ్ల పార్లమెంట్ నియోజకవర్గ పరిధిలో బీఆర్ఎస్ నుంచి నలుగురు ఎమ్మెల్యేలు గెలవగా, కాంగ్రెస్ నుంచి ముగ్గురు విజయం సాధించారు. రాజేంద్ర నగర్ లో బీఆర్ఎస్నుంచి పోటీ చేసిన ప్రకాశ్ గౌడ్, చేవెళ్లలో కాలె యాదయ్య, శేరిలింగంపల్లిలో అరికెపూడి గాంధీ, మహేశ్వరం నుంచి మాజీ మంత్రి సబితా రెడ్డి గెలుపొందారు. కాంగ్రెస్ తరపున పరిగి నుంచి రామ్మోహన్రెడ్డి, తాండూరులో మనోహర్రెడ్డి, వికారాబాద్లో ప్రస్తుత స్పీకర్ గడ్డం ప్రసాద్కుమార్ విక్టరీ కొట్టారు. ఎమ్మెల్యేల పరంగా చూస్తే నువ్వా నేనా అన్నట్లు ఉన్నా అసెంబ్లీ ఎన్నికల్లో ఓటమి తర్వాత బీఆర్ఎస్ గ్రాఫ్ పడిపోతోందని, ప్రస్తుతం బీజేపీ, కాంగ్రెస్ మధ్యే ప్రధాన పోటీ ఉందని రాజకీయ విశ్లేషకులు అంచనా వేస్తున్నారు. దీనికితోడు రాజేంద్రనగర్ఎమ్మెల్యే ప్రకాశ్గౌడ్, చేవెళ్ల శాసనసభ్యుడు యాదయ్య ఈ మధ్య సీఎం రేవంత్రెడ్డిని కలవడంతో వారు పార్టీ మారుతారన్న ప్రచారం సాగింది. ఇందుకు బలం చేకూర్చేలా రాజేంద్ర నగర్ లో ప్రకాష్ గౌడ్ అనుచరులు, బండ్లగూడ జాగీర్ కార్పొరేషన్ మేయర్ సహా పలువురు కార్పొరేటర్లు కాంగ్రెస్లో చేరడంతో బీఆర్ఎస్ క్యాడర్ అయోమయంలో పడింది.
