- వనపర్తి జిల్లాలో ఒక్క రెగ్యులర్ ఎంఈవో కూడా లేరు!
- ఆరుగురు ఇన్చార్జి ఎంఈవోలకు 15 మండలాల బాధ్యతలు
- నష్టపోతున్న హోంస్కూల్ స్టూడెంట్లు
వనపర్తి, వెలుగు : వనపర్తి జిల్లాలో ఉన్న ఒక్క రెగ్యులర్ ఎంఈవో ఇటీవల రిటైర్డ్ కావడంతో.. రెగ్యులర్ ఎంఈవో లేని జిల్లాగా మారింది. జిల్లాలో 15 మండలాలు ఉండగా, ఆరుగురు ఇన్చార్జి ఎంఈవోలు పని చేస్తున్నారు. ఒక్కొక్కరికి రెండు నుంచి నాలుగు మండలాల బాధ్యతలు అప్పగించడంతో పాఠశాలల పర్యవేక్షణ జరగడం లేదు. అలాగే ఇన్చార్జి ఎంఈవోలకు సంబంధించిన స్కూల్లో ఆ సబ్జెక్ట్ బోధన అంతంతమాత్రంగానే జరగడంతో విద్యార్థులు నష్టపోతున్నారు.
ఇన్చార్జి బాధ్యతలతో సతమతం..
వనపర్తి ఇన్చార్జి ఎంఈవో శ్రీనివాస్గౌడ్కు గోపాల్పేట, రేవల్లి, కొత్తగా ఏర్పడిన ఏదుల ఇన్చార్జి బాధ్యతలు ఇచ్చారు. పెద్దమందడి మండలం బలిజపల్లి గెజిటెడ్ హెచ్ఎం జయశంకర్ ఖిల్లాగణపురం మండలం సోలీపూరుకు ట్రాన్స్ఫర్ అయ్యారు. అప్పటికే పెద్దమందడి ఎంఈవోగా ఉన్న ఆయనకు పాన్గల్ ఇన్చార్జి బాధ్యతలు ఇచ్చారు.
ఇలా ఒక్కో ఇన్చార్జి ఎంఈవోకు రెండు నుంచి నాలుగు మండలాల బాధ్యతలు ఇవ్వడంతో వారు సరైన న్యాయం చేయలేకపోతున్నారని టీచర్లు పేర్కొంటున్నారు. వనపర్తి జిల్లాలో ఉన్న ఒక్కగానొక్క రెగ్యులర్ ఎంఈవో జులై 31న రిటైర్ అయ్యారు. దీంతో 15 మండలాలు ఉన్న వనపర్తి జిల్లాలో ప్రస్తుతం ఏ ఒక్క మండలానికి రెగ్యులర్ ఎంఈవో లేకుండా పోయారు.
ఎంఈవోల బాధ్యతలేంటి?
స్కూల్ కాంప్లెక్స్ హెడ్మాస్టర్కు కాంప్లెక్స్ పరిధిలోని 15 ప్రైమరీ, అప్పర్ ప్రైమరీ స్కూళ్ల బాధ్యతలు అప్పగించడంతో ఎంఈవోలకు కొంత భారం తగ్గినట్లయింది. కానీ, రెగ్యులర్ ఎంఈవోలు కాకపోవడంతో ఇన్చార్జిగా ఉంటూనే తాము పని చేసే స్కూల్ బాగోగులు, పర్యవేక్షణ చేయాల్సి ఉంటుంది. ఒక్కొక్కరికి నాలుగు మండలాల బాధ్యతలు ఇవ్వడంతో హోమ్ స్కూల్ను సీనియర్ స్కూల్ అసిస్టెంట్కు అప్పగించి పోవాల్సి వస్తోంది. ఆయన తనకెందుకు తలనొప్పి అనుకుంటే.. ఇక ఆ స్కూల్ సంగతి అంతే.
జిల్లాలోని గెజిటెడ్ హెచ్ఎంలు ప్రమోషన్లపై నియమితులయ్యారు. కాబట్టి, గతంలో స్కూల్ అసిస్టెంట్గా ఏ సబ్జెక్టు చెప్పారో గెజిటెడ్ హెచ్ఎంగా పని చేసే చోట కూడా అదే సబ్జెక్టు చెప్పాల్సి ఉంటుంది. ఎంఈవోలు ఎల్ఎఫ్ఎన్, ఎల్ఐపీ ప్రోగ్రామ్లను పర్యవేక్షించాలి. స్కూళ్లలో మిడ్ డే మీల్స్, పాఠ్యపుస్తకాలు, నోట్బుక్కుల పంపిణీ, టీచర్ల హాజరు నమోదు, లేట్గా వస్తే నోటీసులు ఇవ్వడం, మెడికల్ లీవ్లు పెట్టుకుంటే ప్రొసీడింగ్స్ శాంక్షన్ చేయడం. స్కూళ్లలో టీచర్ల బోధన తీరు, స్టూడెంట్ల విద్యాసామర్థ్యం ఇలా పలు అంశాలను పర్యవేక్షించాల్సి ఉంటుంది. అదనపు భారంతో ఇవేమిపెద్దగా పట్టించుకోవడంలేదు. ఏదో ఒక స్కూల్ను మొక్కుబడిగా విజిట్ చేసి అక్కడ మిడ్ డే మీల్స్రుచి చూసి, ఒక క్లాసులో స్టూడెంట్స్తో మాట్లాడి వస్తున్నారు.
కోర్టు స్టేతో నిలిచిన నియామకాలు..
ఎంఈవోపోస్టులను ప్రభుత్వ స్కూళ్లలో పని చేసే వారితోనే భర్తీ చేయాలని, జడ్పీ హైస్కూళ్లలో పని చేసే గెజిటెడ్ హెచ్ఎంలతో భర్తీ చేయవద్దనే విషయంలో కోర్టులో కేసు నడుస్తోంది. దీంతో గత కొన్నాళ్లుగా రెగ్యులర్ ఎంఈవోల నియామకాలు జరగడంలేదు. ఇన్చార్జీగా కొనసాగుతున్న వారిని అలాగే కొనసాగించాలని, వారు రిటైర్ అయితే వారి స్థానంలో వేరే వారికి ఇన్చార్జి ఇవ్వవద్దని, పక్క మండలానికి చెందిన ఎంఈవోకే ఇన్చార్జిగా బాధ్యతలు ఇవ్వాలని ఆదేశాలు ఉండడంతో ఒక్కొక్కరు నాలుగు మండలాలు చూస్తున్నారు.
అదనపు బాధ్యతలతో ఇబ్బందులు..
నాకు నాలుగు మండలాల బాధ్యతలు ఇచ్చారు. అన్ని మండలాలు తిరిగి స్కూళ్లను విజిట్ చేయాలంటే ఇబ్బందిగా ఉంది. ప్రభుత్వం ఎంఈవోలనునియమిస్తామని చెప్పింది. దాన్ని అమలు చేస్తే మండలానికో ఆఫీసర్ వచ్చి స్కూళ్లకు న్యాయం జరుగుతుంది.
- శ్రీనివాస్గౌడ్, ఇన్చార్జి ఎంఈవో, వనపర్తి
