హైదరాబాద్, వెలుగు: గల్ఫ్ దేశం యూఈఏ కేంద్రంగా కార్యకలాపాలు సాగించే లులూ గ్రూప్ ద్వారా తెలంగాణలో నిర్మించిన మొట్టమొదటి హైపర్మాల్ బుధవారం నుండి హైదరాబాద్వాసులకు వెల్కమ్ చెప్పడానికి ముస్తాబయింది. లులూ గ్రూప్ చైర్మన్‌, మేనేజింగ్‌ డైరెక్టర్ యూసఫ్‌ అలీ సమక్షంలో ఐటీ, పరిశ్రమల శాఖ మంత్రి కేటీఆర్‌ మాల్‌‌‌‌‌‌‌‌ను ప్రారంభించనున్నారు.
కూకట్పల్లిలోని ఈ మాల్ ఐదు లక్షల చదరపు అడుగుల విస్తీర్ణంలో విస్తరించి ఉందని, మాల్‌‌‌‌‌‌‌‌లోనే ఏడు రెస్టారెంట్లు, ఫుడ్ కోర్ట్, ప్లే ఏరియాలు కూడా ఉన్నాయని లులూ గ్రూప్ ఇండియా షాపింగ్ మాల్స్ డైరెక్టర్ శిబు ఫిలిప్స్ తెలిపారు. ఈ ప్రాజెక్ట్ కోసం సంస్థ రూ. 300 కోట్లను పెట్టుబడిగా పెట్టింది.
ఈ మాల్‌‌‌‌‌‌‌‌లో 75కి పైగా స్థానిక అంతర్జాతీయ బ్రాండ్‌‌‌‌‌‌‌‌లను కొనుక్కోవచ్చు. అంతేగాక 1,400 మంది సీటింగ్ కెపాసిటీతో 5 -స్క్రీన్ సినిమా మరో ప్రత్యేకత. ఇక్కడ కిరాణా, ఫ్యాషన్, హోం అప్లియెన్సెస్, ఎలక్ట్రానిక్స్, ఐటీ, లైఫ్స్టైల్ ప్రొడక్టులను కొనుక్కోవచ్చు.
విస్తరణ భాగంగా నగరంలోని మరో చోట కూడా హైపర్మాల్ను రెండేళ్లలోపు ఏర్పాటు చేస్తామని ఫిలిప్స్ అన్నారు. తెలంగాణలోని చిన్న నగరాల్లో స్టోర్లు తెరిచే ఆలోచన ఉందని వివరించారు. ప్రస్తుతం తమకు దేశంలో ఆరు మాల్స్ ఉన్నాయని, విదేశాలతో కలుపుకుంటే వీటి సంఖ్య 250కి చేరుతుందని చెప్పారు. తెలంగాణలో ఫిష్ ప్రాసెసింగ్ యూనిట్ను నెలకొల్పడంపైనా ప్రభుత్వంతో చర్చిస్తున్నామని చెప్పారు.
