కరోనాను లెక్కచేయని జనం.. సొంతూళ్లకు వెళ్లేందుకు కోట్లమంది క్యూ
షాంఘై : చైనాలో లూనార్ న్యూఇయర్ సందడి మొదలైంది. ఓవైపు కరోనా కేసులు భారీగా నమోదవుతున్నా.. కొత్త ఏడాది సంబరాలను ఈసారి మిస్ కావొద్దని చైనీయులు భావిస్తున్నారు. వైరస్ భయంతోనే సొంతూరికి బయలుదేరుతున్నారు. ఈ నెల 21 నుంచి కొత్త ఏడాది మొదలు కానుండడంతో రైల్వే స్టేషన్లు, ఎయిర్ పోర్టుల్లో బారులుతీరారు. సొంతవాహనాలలో వెళ్లే వారు కూడా ప్రయాణ ఏర్పాట్లు చేసుకుంటున్నారు. కొత్త సంవత్సరం వేడుకలను సొంతూళ్లో జరుపుకోవడం చైనీయుల సంప్రదాయం. నలభై రోజుల పాటు జరిగే ఈ పండుగకు భారీ సంఖ్యలో జనం ప్రయాణాలు చేస్తుంటారు. దీనికి ‘గ్రేట్ మైగ్రేషన్’ అని కూడా వ్యవహరిస్తారు. కరోనా కారణంగా మూడేళ్లుగా పండుగను సంప్రదాయం ప్రకారం జరుపుకోవడం చైనీయులకు వీలుకాలేదు. ప్రభుత్వం ఇటీవలే ఆంక్షలను సడలించింది.
40 రోజుల వేడుక..
ప్రయాణం మొదటి రోజును చున్యున్ అని పిలుస్తారు. ఇది శనివారం మొదలైంది. 40 రోజుల పాటు ఈ లూనార్ న్యూఇయర్ వేడుక కొనసాగుతుంది. 2020 తర్వాత ఎలాంటి ఆంక్షలు లేకుండా ప్రయాణాలకు అనుమతించడం ఇదే తొలిసారి.
200 కోట్ల ప్రయాణాలు..
ఈ ఏడాది సుమారు 200 కోట్ల(రాకపోకలు కలిపి) ప్రయాణాలు జరుగుతాయని రవాణా శాఖ అధికారుల అంచనా. గత ఏడాదితో పోలిస్తే ఇది 99.5 శాతం పెరిగింది. కరోనా ముందు అంటే 2019తో పోలిస్తే 70.3% పెరిగింది. సొంత ఊర్లకు వెళ్లి కొత్త ఏడాది సంబురాలు జరుపుకునేందుకు దాదాపు మూడేండ్ల తర్వాత అవకాశం దక్కడంతో చాలా మంది ప్రయాణాలకు సిద్ధమవుతున్నారు. కరోనా భయాలు వెంటాడుతున్నా ఎక్కువ శాతం
మంది వెనక్కి తగ్గడం లేదు.
కరోనా పాలసీ విమర్శకులపై కొరడా
1,120 సోషల్ మీడియా అకౌంట్ల తొలగింపు
చైనా మరోసారి తన సిటిజన్ల భావ ప్రకటన స్వేచ్ఛను హరించింది. ప్రభుత్వ కరోనా పాలసీలపై విమర్శలు చేస్తున్న వారిపై నిరంకుశంగా వ్యవహరించింది. విమర్శకులకు చెందిన దాదాపు 1,120 సోషల్ మీడియా అకౌంట్లను ఆయా ప్లాట్ ఫామ్ల నుంచి తొలగించింది. కరోనా పాలసీని విమర్శిస్తూ కొందరు స్కాలర్లు, మెడికల్ ఎక్స్ పర్ట్స్ సోషల్ మీడియా వేదికగా రాసే విశ్లేషణలపై చైనా సర్కారు నుంచి దాదాపు 12,854 అభ్యంతరాలు వ్యక్తమయ్యాయని ప్రముఖ చైనీస్ సోషల్ మీడియా సంస్థ ‘సినా వీబో’ వెల్లడించింది. ఇంకొందరు విమర్శకుల సోషల్ మీడియా అకౌంట్లపై సైబర్ దాడులు కూడా జరిగాయని పేర్కొంది. కఠిన లాక్ డౌన్లు, క్వారెంటైన్ నిబంధనలు సరైనవే అనే మెసేజ్ జనంలోకి పంపేందుకు చైనా సర్కారు స్కాలర్లు, మెడికల్ ఎక్స్ పర్ట్స్పై ఆధారపడుతోంది. వీరిలో ఎవరైనా ప్రభుత్వ వైఖరిని తప్పుపడుతూ మాట్లాడితే మాత్రం.. వేధింపులకు పాల్పడుతోంది. గత 24 గంటల్లో చైనాలో 10వేల పైచిలుకు కరోనా కేసులు నమోదవగా, ముగ్గురు వైరస్ తో చనిపోయారు. ఈవిధంగా ఓ వైపు కేసులు పెరుగుతున్నా చైనా సర్కారు పట్టనట్టు వ్యవహరిస్తోందని నిపుణులు విమర్శిస్తున్నారు. ఈ విమర్శలు మింగుడుపడకే తాజాగా వెయ్యికిపైగా నిపుణుల సోషల్ మీడియా అకౌంట్లను చైనా ప్రభుత్వం మూసివేయించింది.
