న్యూఢిల్లీ: లగ్జరీ ఇండ్ల అమ్మకాలలో హైదరాబాద్ సిటీ దూసుకెళ్తోంది. రూ. 4 కోట్లకు మించి విలువున్న లగ్జరీ ఇండ్ల కొనుగోలు సిటీలో జోరందుకుని ఏకంగా 20 రెట్లు పెరిగినట్లు ఒక రిపోర్టు వెల్లడించింది. ఈ ఏడాది ఏప్రిల్–జూన్ మధ్య కాలంలో సిటీలో ఇలాంటి మొత్తం 1,000 ఇండ్లు విక్రయమైనట్లు తెలిపింది. అంతకు ముందు ఏడాది ఇదే కాలంలో లగ్జరీ ఇండ్ల అమ్మకాలు కేవలం 50 యూనిట్లు మాత్రమే కావడం గమనించాలి. ఇక దేశంలోని ఏడు ప్రధాన సిటీలలోను కలిపి ఏప్రిల్– జూన్ మధ్య కాలంలో రూ. 4 కోట్లపైన విలువుండే 3,100 లగ్జరీ ఇండ్లు విక్రయమైనట్లు సీబీఆర్ఈ రిపోర్టు వెల్లడించింది.
అంతకు ముందు ఏడాది ఇదే కాలానికి చూస్తే ఈ అమ్మకాలు 1,400 యూనిట్లు మాత్రమేనని పేర్కొంది. ఢిల్లీ–ఎన్సీఆర్ ప్రాంతంలో లగ్జరీ ఇండ్ల అమ్మకాలు మూడు రెట్లు పెరిగి 1,050 యూనిట్లకు చేరాయి. పుణెలో అమ్మకాలు 150 యూనిట్లకు పెరగ్గా, చెన్నై, కోల్కతా సిటీలలో కిందటేడాదిలాగే 50 యూనిట్లకు పరిమితమైనట్లు సీబీఆర్ఈ ఈ రిపోర్టులో తెలిపింది. రెండో క్వార్టర్లో ముంబై సిటీలో లగ్జరీ ఇండ్ల సేల్స్ 750 యూనిట్లకు తగ్గిపోయాయి. బెంగళూరు సిటీలోనూ లగ్జరీ ఇండ్ల డిమాండ్ సగానికి పడిపోయింది. ఈ సిటీలో కేవలం 50 లగ్జరీ ఇండ్లు అమ్ముడుపోయాయి.
2023 మిగిలిన ఆరు నెలల్లో రెసిడెన్షియల్ మార్కెట్ జోరు పెరుగుతుంది. సప్లయ్ పైప్లైన్ మెరుగ్గా ఉండటంతోపాటు, ఫెస్టివల్ సీజన్ కావడంతో సేల్స్ పెరుగుతాయి.
- సీబీఆర్ఈ సీఈఓ అన్షుమన్ మాగజైన్
