- ఈ నెల 6 నుంచి క్షేత్ర స్థాయిలో సర్వే
- కామారెడ్డి జిల్లాలో 2,425 మంది ఎన్యుమరేటర్లు
- మండలానికో స్పెషల్ ఆఫీసర్
- 215 మంది సూపర్ వైజర్లు
కామారెడ్డి , వెలుగు : ప్రభుత్వం ప్రతిష్టాత్మకంగా చేపట్టనున్న సమగ్ర సర్వేకు కామారెడ్డి జిల్లాలో యంత్రాంగం సన్నద్ధమవుతోంది. సర్వే ఏర్పాట్లను పకడ్బందీగా చేపడుతున్నారు. ఈ నెల 6 నుంచి క్షేత్ర స్థాయిలో సర్వే జరగనుంది. ఏర్పాట్లపై కలెక్టర్ ఆశిష్ సంగ్వాన్ ఆఫీసర్లకు మార్గనిర్దేశం చేశారు. ఇండ్ల గుర్తింపు, స్టిక్కరింగ్, ఎన్యుమరేటర్లు, సూపర్ వైజర్లు, స్పెషల్ ఆఫీసర్లను నియమించారు. ఆఫీసర్లకు ఇప్పటికే జిల్లా స్థాయిలో ట్రైనింగ్ ఇచ్చారు. సర్వేలో సామాజిక, ఆర్థిక, ఉద్యోగ, రాజకీయ, కుల వివరాలకు సంబంధించి 56 అంశాలు ఉంటాయి.
ఇప్పటికే ఇంటింటికి స్టిక్కర్ వేయించారు. సర్వేకు సంబంధించిన సామగ్రి జిల్లాకు చేరింది. జనాభా లెక్కల ప్రకారం 2,26,386 ఇండ్లు , 2 లక్షల 90వేల కుటుంబాలు ఉన్నాయి. వీటి సంఖ్య ఇంకా పెరిగే అవకాశముంది. 15ఇండ్లకు ఒక ఎన్యుమరేటర్ను నియమిస్తున్నారు. 150 ఇండ్లను కలిపి ఒక ఎన్యుమరేట్ బ్లాక్గా పరిగణిస్తారు. జిల్లాలో 2,385 ఎన్యుమరేటర్ బ్లాక్లు ఉన్నాయి.
ఎన్యుమరేటర్ల నియమాకం
ప్రైమరీ స్కూల్లో పని చేసే టీచర్లు సర్వేలో పాల్గొంటారు. టీచర్లు సరిపోని చోట ఐకేపీ స్టాప్, పంచాయతీ సెక్రటరీలు, ఇతర స్టాఫ్ను తీసుకోనున్నారు. సర్వే కోసం అంగన్వాడి టీచర్లు, ఆశ కార్యకర్తల సేవలను కూడా వినియోగించుకుంటారు. జిల్లాలో 2,425 మంది ఎన్యుమరేటర్లను నియమించారు. 215 మంది సూపర్ వైజర్లు ఉంటారు. ఒక్కో సూపర్ వైజర్ 2, 3 గ్రామాలను పర్యవేక్షిస్తారు. మండలానికో జిల్లా ఆఫీసర్ స్పెషల్ ఆఫీసర్ ను ఉన్నతాధికారులు నియమించారు. సర్వే మధ్యాహ్నాం నుంచి చేపడుతారు. పొద్దున 9 గంటల నుంచి 1 గంట వరకు ప్రైమరీ స్కూల్స్ పని చేస్తాయి. మధ్యాహ్న భోజనం తర్వాత సర్వేలో టీచర్లు పాల్గొంటారు.
ప్రజల్లో అవగాహాన కల్పించేందుకు ..
సమగ్ర సర్వేపై ప్రజల్లో అవగాహన కల్పించేందుకు అధికార కాంగ్రెస్ పార్టీ నేతలు కార్యక్రమాలు నిర్వహిస్తున్నారు. జిల్లాల వారీగా మీటింగ్లు నిర్వహించారు. స్థానిక సంస్థల ఎన్నికల్లో బీసీల రిజర్వేషన్ల అమలుకు సంబంధించి సర్వే ద్వారా బీసీల సంఖ్య తేల్చనున్న నేపథ్యంలో బీసీ సంఘాల ప్రతినిధులను పార్టీ మీటింగ్కు పిలిచారు. సర్వే సజావుగా జరిగేలా ప్రజలకు అవగాహన కోసం పార్టీ శ్రేణులు కూడా పాల్గొననున్నాయి. కామారెడ్డిలో శనివారం జిల్లా కేంద్రంలోని కళాభారతి ఆడిటోరియంలో నిర్వహించిన మీటింగ్కు ప్రభుత్వ సలహాదారులు షబ్బీర్అలీ, పోచారం శ్రీనివాస్రెడ్డి, ఎమ్మెల్యే మదన్మోహన్రావు, కార్పొరేషన్ ఛైర్మన్ బాల్రాజు, డీసీసీ ప్రెసిడెంట్ కైలాస్ శ్రీనివాస్రావు తదితరులు పాల్గొన్నారు.
