జైపూర్, వెలుగు: సింగరేణి థర్మల్ పవర్ ప్లాంట్ (ఎస్టీపీపీ)లో కాంట్రాక్ట్ కార్మికుడిగా పని చేసే ఆర్.మధు జైపూర్ మండలంలోని పెగడపల్లి గ్రామ సమీపంలో ఉన్న సెల్ టవర్ ఎక్కి హల్చల్ చేశాడు. గత కొంత కాలంగా పవర్ మేక్ అనుబంధ కంపెనీలో పనిచేస్తున్నాడు. తన పీఎఫ్ ఖాతా నుంచి సొమ్ము విత్డ్రా చేసుకునేందుకు ప్రయత్నించగా రాలేదు. దీనిపై సంబంధిత కంపెనీ సిబ్బందిని కలిసినప్పటికీ పరిష్కారం చూపలేదని అసహనం వ్యక్తం చేస్తూ సెల్ టవర్ ఎక్కాడు.
విషయం తెలుసుకున్న అడిషనల్ ఎస్ఐ నాగరాజు అక్కడికి చేరుకొని మధును బుజ్జగించే ప్రయత్నం చేశారు. విషయం అడిగి తెలుసుకొని కంపెనీ యాజమాన్యంతో మాట్లాడి న్యాయం చేస్తామని హామీ ఇవ్వడంతో కిందకు దిగాడు. ఇదే సమస్యపై మధు మార్చ్ 16న సైతం జైపూర్ మండల కేంద్రంలోని టవర్ ఎక్కాడు.
