- విజిలెన్స్ విచారణలో సీడీవో మాజీ సీఈ నరేందర్ రెడ్డి
హైదరాబాద్, వెలుగు: ఇండియన్ స్టాండర్డ్ (ఐఎస్) కోడ్స్ ప్రకారమే మేడిగడ్డ బ్యారేజీ డిజైన్లు చేశామని సెంట్రల్ డిజైన్స్ ఆర్గనైజేషన్ (సీడీవో) రిటైర్డ్ సీఈ నరేందర్ రెడ్డి చెప్పారు. మేడిగడ్డ బ్యారేజీపై విచారణ జరుపుతున్న విజిలెన్స్ డిపార్ట్మెంట్.. బుధవారం నరేందర్ రెడ్డిని విచారించింది. దేని ప్రకారం డిజైన్లు చేశారు? ఒకసారి ఇచ్చిన డిజైన్లలో మార్పులు ఎందుకు చేశారు? డిటెయిల్డ్ ఫీల్డ్ ఇన్స్పెక్షన్ చేశారా? వంటి ప్రశ్నలను విజిలెన్స్ డిపార్ట్మెంట్ సంధించింది. డిజైన్ల మార్పుల్లో ఎవరి ప్రమేయం ఉందని అధికారులు ప్రశ్నించినట్టు తెలిసింది. అయితే, ప్రభుత్వ పెద్దల నుంచి వచ్చిన ఆదేశాల మేరకే డిజైన్లు, ప్రాజెక్ట్ డీపీఆర్ను మార్చారని చెప్పినట్టు తెలిసింది. తనకు సంబంధం లేని అంశాలపై తన సంతకాలను తీసుకున్నారని అధికారులకు ఆయన వివరించినట్టు సమాచారం. ఫీల్డ్ఆఫీసర్లు ఇచ్చిన టెస్టు రిపోర్టుల ప్రకారమే డిజైన్లను రూపొందించినట్టు చెప్పారని తెలిసింది. బ్యారేజీ నిర్మాణం పూర్తయ్యాక రక్షణ చర్యలను చేపట్టలేదని వివరించారని తెలిసింది. నిర్మాణంలో క్వాలిటీని పట్టించుకోలేదని, హడావుడిగా పనులు చేయించారని అధికారులకు చెప్పినట్లు సమాచారం.
