పెద్దమ్మాయి పెండ్లి
టైటిల్ : ఉప్పు పులి కారమ్
లాంగ్వేజ్ : తమిళం
ప్లాట్ ఫాం : డిస్నీ ప్లస్ హాట్ స్టార్
డైరెక్షన్ : ఎం. రమేశ్ భారతి
కాస్ట్ : అశ్విని ఆనందిత, వనిత కృష్ణ చంద్రన్, రాజ్ అయ్యప్ప, నవీన్ కుమార్, ఎం. ఫరీనా అజాద్, దీపక్ పరమేశ్, కృష్ణ, పొన్వన్నన్, దీపికా వెంకటాచలం, ఆయేషా జీనత్
సుబ్రమణి ఒక హోటల్ ఓనర్. అతని భార్య సుబ్బు. వీళ్లకు ముగ్గురు ఆడపిల్లలు, ఒక మగపిల్లాడు. పెద్దమ్మాయి చిన్మయికి పెండ్లి చేయాలి అనుకుంటారు. ఆ అమ్మాయి లాయర్. ఆమె మాజీ లవర్ శివ టీవీ ఛానెల్ డైరెక్టర్. కోర్టు విషయాల్లో అప్పుడప్పుడు ఈ ఇద్దరూ కలుస్తుంటారు. అలా కలవడం వల్ల గతం వాళ్లని వెంటాడుతుంటుంది. ఆ తర్వాత ఏమైంది? ఈ ఇద్దరూ ఒక్కటయ్యారా? తెలుసుకోవాలంటే సిరీస్ చూడాల్సిందే. మధ్యతరగతి తల్లిదండ్రులుగా సీనియర్ నటులు తమ పాత్రల్లో జీవించారు. పెద్ద కూతురి పాత్రలో చేసిన ఆయేషా జీనత్ స్క్రీన్ మీద చాలా బాగుంది. ఇది కొరియన్ షో ‘మై ఫాదర్ ఈజ్ స్ట్రేంజ్’ నుంచి తీసుకున్న కథ.
ఆ భూమి చేతికొచ్చిందా?
టైటిల్ : దేఢ్ భిగా జమీన్
లాంగ్వేజ్ : హిందీ
ప్లాట్ ఫాం : జియో సినిమా
డైరెక్షన్ : పుల్కిత్
కాస్ట్ : ప్రసన్న బిష్ట్, ప్రతీక్ గాంధీ, దీపేశ్ సుమిత్ర జగ్దీశ్, దుర్గేశ్ కుమార్, కుషాలీ కుమార్, మృత్యుంజయ్ పాండే, వికాస్ శర్మ
అనిల్ సింగ్గా ప్రతీక్ గాంధీ మెయిన్ రోల్ చేసిన ఈ సినిమా... అతని చెల్లి పెండ్లి ఏర్పాట్లతో మొదలవుతుంది. పెండ్లికి ముందే వరకట్నం తన చేతిలో పడాలని పెండ్లి కొడుకు తండ్రి డిమాండ్ చేస్తాడు. అనిల్ తండ్రికి కొంత భూమి ఉంటుంది. దాన్ని అమ్మితే ఎటువంటి అడ్డంకులు లేకుండా చెల్లి పెండ్లి జరిగిపోతుంది. అందుకని అనిల్ ఆ భూమిని అమ్మడానికి ట్రై చేస్తుంటాడు. ఆ క్రమంలో రకరకాల సమస్యలు ఎదురవుతాయి. భూమి అమ్మడం అనే ప్రాసెస్ కష్టంగా ఉండటమే కాకుండా అనిల్ ఓపికకు పరీక్ష పెడుతుంటుంది. దేడ్ భిగా జమీన్ కథ లెజెండ్ దిలీప్కుమార్ కాలం నాటిది లేదా ఆ కాలం నాటి టీవీ సిరీస్లా అనిపిస్తుంది. సినిమాల్లో, టీవీ సిరీస్ల్లో మీరు ఇంతవరకు చూడని స్క్రీన్ప్లే ఇందులో కనిపిస్తుంది. అనిల్ తల్లిగా నీతా మొహింద్రా, భార్య పూజ రోల్లో కుషాలీ కుమార్, చెల్లెలు నేహగా (ప్రసన్న బిష్ట్) చేశారు. ఇంతకీ భూమి అనిల్కి వచ్చిందా? చెల్లి పెండ్లి జరిగిందా? తెలుసుకోవాలంటే సినిమా చూడాల్సిందే. ఇందులో పెద్దగా చెప్పుకోదగ్గ విషయాలేవీ ఉండవు. ఒక మంచి మనిషికి, దుర్మార్గుడికి మధ్య జరిగే న్యాయ పోరాటం. ఇది ఓ సామాన్యుడి కథ.
మర్డర్కి, క్రిప్టో కరెన్సీకి సంబంధం ఏంటి?
టైటిల్ : హౌస్ ఆఫ్ లైస్ సీజన్ – 1
లాంగ్వేజ్ : హిందీ
ప్లాట్ ఫాం : అమెజాన్ ప్రైమ్ వీడియో
డైరెక్షన్ : సౌమిత్ర సింగ్
కాస్ట్ : సంజయ్ కపూర్, రితురాజ్ సింగ్, సిమ్రాన్ కౌర్, అజితేష్ గుప్తా
ఇది ఒక ఇన్వెస్టిగేటివ్ స్టోరీ. అనగానే భలే ఇంట్రెస్టింగ్గా ఉంది అనిపిస్తుంది. కథలోకి వెళ్తే... ఆల్బర్ట్ పింటో (రితురాజ్ సింగ్) మర్డర్ కేస్ని పోలీస్ ఆఫీసర్స్ రాజీవ్ చౌదరి (సంజయ్ కపూర్), శశి (సిమ్రాన్ కౌర్ సూరి) కలిసి ఇన్వెస్టిగేషన్ చేస్తుంటారు. అయితే, అందులో దొరికిన ‘క్లూ’ ప్రకారం, ఒకరు మర్డర్ కేస్ని సాల్వ్ చేస్తుండగా, మరొకరు పోగొట్టుకున్న కోట్ల విలువ చేసే క్రిప్టో కరెన్సీ గురించి ఫోకస్ చేస్తారు. ఇంతకీ ఆ మర్డర్కి, క్రిప్టో కరెన్సీకి ఉన్న సంబంధం ఏంటి? అసలు మర్డర్ ఎందుకు జరిగింది? ఎవరు చేశారు? వంటి విషయాలు తెలియాలంటే ఈ సిరీస్ చూడాలి. ఈ క్రైమ్ స్టోరీలోని క్యారెక్టర్స్కి ఒకదానితో ఒకటి కెమిస్ట్రీ అంతగా కుదిరినట్టు లేదు.
ఫేమస్ అవ్వాలని..
టైటిల్ : గీక్ గర్ల్
లాంగ్వేజ్ : హిందీ, ఇంగ్లిష్
ప్లాట్ ఫాం : నెట్ఫ్లిక్స్
డైరెక్షన్ : జెస్సికా రుస్టన్, హోలీ స్మేల్
కాస్ట్ : ఎమిలీ కేరీ, లియామ్ వుడ్రమ్, డైసీ జెల్లే, సారా పారిష్, శాండ్రా, టిమ్ డౌనీ, జెమిమా రూపర్, ఇమ్మాన్యుయేల్ ఇమాని
హారియెట్ మ్యానర్స్ (ఎమిలీ కేరీ)ని స్కూల్లో స్టూడెంట్స్ ‘గీక్’ అనే పేరుతో పిలుస్తుంటారు. గీక్ అనగానే ఆమె గుర్తొచ్చేస్తుంది. హారియెట్కి అందరూ తనను గుర్తించడాన్ని, పొగడడాన్ని చాలా ఇష్టపడుతుంది. ఆ ఐడెంటిటీ కోసం రకరకాల ప్రయత్నాలు చేస్తుంటుంది. అందులో భాగంగా లండన్లోని ఫ్యాషన్ వీక్ ట్రిప్కి వెళ్లొచ్చాక తన లైఫ్లో చాలా మార్పులు చోటుచేసుకుంటాయి. ఆ తర్వాత మోడలింగ్ ఏజెన్సీ తనతో కాంట్రాక్ట్ సైన్ చేయించుకోవాలి అనుకుంటుంది. ఆ తర్వాత ఏం జరిగిందనేది? తెలుసుకోవాలంటే సిరీస్ చూడాల్సిందే. టీనేజ్లో ఉండే క్రష్లు, ఎంజాయ్మెంట్ అన్నీ ఇందులో కనిపిస్తాయి. పది ఎపిసోడ్ల సిరీస్ అయినా బోర్ కొట్టదు. ఎమిలీ నటన ఈ సిరీస్ని నెక్స్ట్ లెవల్కి తీసుకెళ్తుంది.
ఓ లాయర్.. అంతరంగ సంఘర్షణ
టైటిల్ : ఇల్లీగల్ సీజన్ 3
లాంగ్వేజ్ : హిందీ
ప్లాట్ ఫాం : జియో సినిమా
డైరెక్షన్ : సాహిర్ రజా
కాస్ట్ : నేహా శర్మ, పీయూష్ మిశ్రా, అక్షయ్ ఒబెరాయ్, సత్యదీప్ మిశ్రా, నీల్ భూపాలం, జయిన్ మేరీ ఖాన్, ఆషీమా వర్ధన్
నిహారిక సింగ్ (నేహా శర్మ) డెడికేటెడ్ లాయర్. కాకపోతే పర్సనల్, ప్రొఫెషనల్ లైఫ్లు ఒకదానితో ఒకటి కనెక్ట్ అయినప్పుడు ఆమెకు పరీక్షలా ఉంటుంది. ఆ పరిస్థితులని నిహారిక ఎలా హ్యాండిల్ చేసింది అనేది స్టోరీ. ఈ కథ ఎంత ఎంగేజింగ్గా ఉందో దానికి తగ్గట్టే మిగతా స్టోరీలు కూడా సపోర్ట్ చేశాయి. చట్టపరమైన అంశాలు, వ్యక్తిగత సమస్యలతో డీల్ చేయడం చక్కగా చూపించారు. ఈ సీజన్లో నిహారిక కొలీగ్ పునీత్ (సత్యదీప్ మిశ్రా) కనిపిస్తాడు. దాంతోపాటు అక్షయ్ (అక్షయ్ ఒబెరాయ్) క్యారెక్టర్ రావడంతో ఎమోషనల్ పర్సంటేజ్ పెరుగుతుంది. ఇంతకీ వీళ్లిద్దరూ ఎవరు? నిహారిక ఎటువంటి విషయాలు ఎదుర్కోవాల్సి వచ్చింది? వాటిని తనెలా డీల్ చేసింది? వంటి విషయాలు ఆసక్తికరంగా ఉంటాయి. మొత్తంగా ఈ లీగల్ డ్రామా చూడడానికి బాగుంటుంది.
మాఫియా ముఠా v/s సైబర్ ఎక్స్పర్ట్
టైటిల్ : కీచురాళ్లు
లాంగ్వేజ్ : మలయాళం, తెలుగు
ప్లాట్ ఫాం : ఈటీవీ విన్
డైరెక్షన్ : రాహుల్ రిజీ నాయర్
కాస్ట్ : రజీషా విజయన్, శ్రీనివాసన్, విజయ్ బాబు, మణికందన్
రాధిక (రజీషా విజయన్) సైబర్ సెక్యూరిటీ డిపార్ట్మెంట్లో పనిచేస్తుంటుంది. కొన్ని కేసులు సాల్వ్ చేయడానికి పోలీస్ డిపార్ట్మెంట్ ఆమె సాయం తీసుకుంటుంటారు. రాధిక తండ్రి సీనియర్ లాయర్. ఇంట్లో వాళ్లిద్దరే ఉంటారు. ఫ్రిజ్ రిపేర్ కోసం ఒక నెంబర్కి కాల్ చేస్తుంది. అది రాంగ్ నెంబర్ అని తెలిసి ఫోన్ కట్ చేస్తుంది. అయితే, ఆ నెంబర్ కిలి బిజూ అనే అతనిది. అతను మాఫియా ముఠాకి సంబంధించిన లోకల్ గ్యాంగ్లో ఒకడు. ఆ గ్యాంగ్లో ఉండే ఐదుగురు స్క్రాప్ బిజినెస్ చేస్తున్నట్టు ఆ ప్రాంత ప్రజలను నమ్మిస్తుంటారు. రాధిక ఫోన్ చేసినప్పుడు కిలి బిజూకి ఆమె వాయిస్ నచ్చడంతో మళ్లీ తనతో మాట్లాడాలి అనుకుంటాడు. ఆమె గురించి తెలుసుకుని వేధిస్తుంటాడు. పోలీసులకు విషయం తెలిసి పిలిచి మందలిస్తారు. కానీ ఆ తరువాత వాళ్లు ఇంకా రెచ్చిపోతారు. రాధికకి వాళ్ల నిజస్వరూపం తెలుస్తుందా? తెలిస్తే ఎలా తెలుసుకోగలిగింది? వాళ్లకెలా బుద్ధి చెప్పింది? అనేది మిగతా కథ. కథంతా హీరోయిన్ చుట్టూరా నడుస్తుంది. రజీషా పర్ఫార్మెన్స్ బాగుంది.
