వేములవాడరూరల్/ఎల్లారెడ్డిపేట, వెలుగు: మాఘ అమావాస్య జాతర సందర్భంగా వేములవాడ మండలంలోని పలు గ్రామాల్లోని ఆలయాల్లో కల్యాణోత్సవాలను ఘనంగా నిర్వహించారు. నాగాయపల్లి దుబ్బ రాజరాజేశ్వరస్వామి ఆలయంలో శివకల్యాణం, కోడెమొక్కు, రథోత్సవాలను, కొడుముంజ గ్రామంలోని రామప్ప రామలింగేశ్వరస్వామి ఆలయంలో పార్వతీపరమేశ్వరుల కల్యాణం ఘనంగా నిర్వహించారు.
ఈ సందర్భంగా ప్రభుత్వ విప్, ఎమ్మెల్యే ఆది శ్రీనివాస్ పాల్గొని ప్రత్యేక పూజలు నిర్వహించారు. ఎల్లారెడ్డిపేట మండలంలోని కేశవ పెరమండ్ల ఆలయం, అక్కపల్లిలో బుగ్గరాజేశ్వర స్వామి, గొల్లపల్లి గాలంగుట్ట ఆంజనేయ స్వామి ఆలయాలు భక్తులతో కిటకిటలాడింది.
రామనామ స్మరణతో మార్మోగిన ఆలయాలు
కోనరావుపేట, వెలుగు; కోనరావుపేట మండలం మామిడిపల్లి, నాగారం, ధర్మారం గ్రామాల్లో మాఘ అమావాస్య జాతర ఉత్సవాలు వైభవంగా జరిగాయి. వేములవాడ అనుబంధ ఆలయమైన కోనరావుపేట మండలం మామిడిపెళ్లి సీతారామస్వామి, నాగారం కోదండరామస్వామి ఆలయాలు రామ నామస్మరణతో మార్మోగాయి. వేములవాడ ఎమ్మెల్యే ప్రభుత్వ విప్ ఆది శ్రీనివాస్ కాంగ్రెస్ పార్టీ నాయకులతో కలిసి నాగారం కోదండ రామస్వామి, మామిడిపల్లి సీతారామస్వామి ఆలయంలో ప్రత్యేక పూజలు నిర్వహించారు.
