అలంపూర్, వెలుగు: జోగులాంబ, బాల బ్రహ్మేశ్వరస్వామి ఆలయాల్లో నేటి నుంచి శివరాత్రి ఉత్సవాలు ప్రారంభం కానున్నాయి. ఆలయానికి లైటింగ్, భక్తుల కోసం చలవ పందిళ్లు, చలివేంద్రం ఏర్పాటు చేశారు. భక్తుల కోసం 20 వేల లడ్డూ ప్రసాదాలను అందుబాటులో ఉంచారు. మంగళవారం ఉదయం 8 గంటల నుంచి యాగశాల ప్రవేశం, గణపతి పూజ, పుణ్యాహవాచనం, ఋత్విక్ వరణం, అఖండ దీప స్థాపన, మహా కలశ స్థాపన, రుద్రహోమం కార్యక్రమాలను నిర్వహిస్తారు.
సాయంత్రం 4 గంటల నుంచి మృత్సంగ్రహణం, అంకురార్పణ, అగ్ని ప్రతిష్టాపన, భేరిపూజ, బలిహరణ, సాయంత్రం6 గంటలకు ధ్వజారోహణం నిర్వహించనున్నట్లు ఈవో పురేందర్ కుమార్ తెలిపారు. ఉత్సవ ఏర్పాట్లను తహసీల్దార్ మంజుల, మున్సిపల్ కమిషనర్ చంద్రశేఖర రావు, ఎస్సై వెంకటస్వామి, ఆలయ కమిటీ చైర్మన్ నాగేశ్వర్రెడ్డి పరిశీలించారు. స్వామి, అమ్మవార్లను గద్వాల సంస్థానం వంశస్థులు శ్రీకృష్ణ రాంభూపాల్ దర్శించుకొని ప్రత్యేక పూజలు చేశారు.
