-
బీజేపీ సీనియర్ నేత ఒకరు వెల్లడి
ముంబై: మహారాష్ట్రలో డిసెంబరు 5న మహాయుతి కూటమి కొత్త ప్రభుత్వాన్ని ఏర్పాటుచేసే చాన్స్ ఉందని బీజేపీ సీనియర్ నేత ఒకరు వెల్లడించారు. గతంలో రెండుసార్లు సీఎంగా, ఒకసారి డిప్యూటీ సీఎంగా పనిచేసిన బీజేపీ సీనియర్ నేత దేవేంద్ర ఫడ్నవీస్..ఇప్పుడు సీఎం రేసులో ముందంజలో ఉన్నారని తెలిపారు. ఆయనే మహారాష్ట్ర తదుపరి సీఎంగా బాధ్యతలు చేపట్టే అవకాశం ఎక్కువగా ఉందని అభిప్రాయపడ్డారు.
దక్షిణ ముంబైలోని ఆజాద్ మైదాన్‌‌లో ముఖ్యమంత్రి ప్రమాణస్వీకార కార్యక్రమం జరుగుతుందన్నారు. అయితే, అంతకు ముందు డిసెంబర్ 2న బీజేపీ శాసనసభా పక్ష నేతను ఎంపిక చేసేందుకు సమావేశం నిర్వహిస్తామని చెప్పారు. కాగా..సీఎంగా ఎవరు ఉండాలనేదానిపై బీజేపీ తీసుకునే నిర్ణయానికి పూర్తి మద్దతిస్తానని ఇప్పటికే కేర్‌‌టేకర్ సీఎం ఏక్‌‌నాథ్ షిండే స్పష్టం చేయగా, అజిత్ పవార్ నేతృత్వంలోని ఎన్సీపీ మాత్రం ఫడ్నవీస్‌‌కు సీఎం పదవి ఇవ్వాలని క్లారిటీగా చెప్పింది.
