- పాలమూరు మున్సిపల్ చైర్మన్ ఆనంద్ గౌడ్
పాలమూరు, వెలుగు : మాజీ మంత్రి వి.శ్రీనివాస్ గౌడ్ మతిభ్రమించి మాట్లాడుతున్నారని మహబూబ్నగర్ మున్సిపల్ చైర్మన్ ఆనంద్ గౌడ్ ఫైర్ అయ్యారు. ఆయన తమ్ముడు వి.శ్రీకాంత్ గౌడ్ అరెస్ట్ను జీర్ణించుకోలేక ఆగంఅవుతున్నారని.. ప్రజా ప్రభుత్వంపై ఇష్టమొచ్చినట్లు ఆరోపణలు చేస్తున్నారని ఆగ్రహం వ్యక్తం చేశారు. స్థానిక పార్టీ ఆఫీసులో శుక్రవారం మీడియాతో మాట్లాడారు. ప్రజా ప్రభుత్వం చేస్తున్న సంక్షేమాన్ని చూసి ఓర్వలేకనే సీఎం రేవంత్ రెడ్డి, ఎమ్మెల్యే యెన్నం శ్రీనివాస్ రెడ్డిపై విమర్శలు చేస్తున్నారన్నారు.
శ్రీనివాస్గౌడ్ తన హయాంలో ప్రజలపై కేసులు పెట్టించి భయభ్రాంతులకు గురి చేశారని ఆరోపించారు. ఆయన వెంట ఉన్న వారంతా ఆయన బాధితులేనని తెలిపారు. సర్వే నంబర్ 523లో ఏ4 గా శ్రీకాంత్ గౌడ్పై కేసు నమోదైందని పోలీసులు నిర్ధారించిన వెంటనే, తమ్ముడిని దొంగచాటుగా హైదరాబాద్లో సీక్రెట్ ప్లేస్లో దాచి ఉంచారన్నారు. ఆ లొకేషన్ను పోలీసులు గుర్తించారన్న విషయాన్ని తెలుసుకున్న ఆయన తన తమ్ముడిని పోలీస్ స్టేషన్లో అప్పజెప్పాడని గుర్తు చేశారు. ఇప్పుడు తమ్ముడి అరెస్ట్ను జీర్ణించుకోలేక పాలమూరులో అనవసరంగా హంగామా చేస్తున్నాడని ఫైర్ అయ్యారు.
మహబూబ్నగర్ అర్బన్ డెవలప్మెంట్ అథారిటీ చైర్మన్ లక్ష్మణ్ యాదవ్ మాట్లాడుతూ పాలమూరులో బీసీలపై కేసులు పెట్టించింది శ్రీనివాస్ గౌడ్ అన్నారు. కాంగ్రెస్ పార్టీపై, ఎమ్మెల్యేపై సోషల్ మీడియాలో అనుచిత పోస్టులు పెడితే సహించమన్నారు. గ్రంథాలయ చైర్మన్ మల్లు నర్సింహారెడ్డి, డీసీసీ ప్రధాన కార్యదర్శి సిరాజ్ ఖాద్రి, కౌన్సిలర్ నర్సింలు, లీడర్లు తిరుమల వెంకటేశ్, ఫయాజ్, నాగరాజు పాల్గొన్నారు.
