- ముఖ్య నేతల మీటింగ్లతో కోలాహలం
- ఈ రోజు సీఎం రేవంత్రెడ్డి సభ
- మే ఫస్ట్ వీక్లో ఆర్మూర్కు రాహుల్, ప్రియాంక..మీటింగ్కు సన్నాహాలు
- అర్వింద్ తరఫున 25న సెంట్రల్ రైల్వే మినిస్టర్ అశ్వినీ వైష్ణవ్ రాక
- బీజేపీ నుంచి ప్రధాని మోదీ లేదా అమిత్షా టూర్
- మే 6న బీఆర్ఎస్ చీఫ్ కేసీఆర్ సభ..
- కేటీఆర్..హరీశ్ రావు కార్నర్ మీటింగ్లు
నిజామాబాద్, వెలుగు : నిజామాబాద్ పార్లమెంట్ స్థానాన్ని ఎలాగైనా గెలవాలని ప్రధాన పార్టీలు స్పెషల్ ఫోకస్ పెట్టాయి. ఓటర్ల ఆదరణతో గట్టెక్కే ప్రయత్నాలు చేస్తున్నాయి. అభ్యర్థుల పోటాపోటీ ప్రచారాలను మరింత హోరెత్తించడానికి ముఖ్య నేతలు రంగంలో దిగనున్నారు. రానున్న 15 రోజులు క్యాంపెనింగ్ లీడర్ల టూర్లతో కోలాహలంగా మారనుంది. పార్టీ క్యాడర్లో జోష్ పెంచేలా లీడర్లు ప్లాన్ చేసుకున్నారు. కాంగ్రెస్ అభ్యర్థి టి.జీవన్రెడ్డి తరఫున సోమవారం సీఎం రేవంత్రెడ్డి ప్రచారానికి రానుండగా మే మొదటి వారంలో ఆగ్రనేతలు రాహుల్ లేదా ప్రియాంకతో సభ పెట్టించే ప్రయత్నాలు చేస్తున్నారు.
25న బీజేపీ అభ్యర్థి ధర్మపురి అర్వింద్ ప్రచారానికి సెంట్రల్ రైల్వే మినిస్టర్ అశ్విన్ వైష్ణవ్ ప్రొగ్రాం ఫిక్స్ అయింది. ప్రధాని మోదీ లేదా కేంద్ర హోం మంత్రి అమిత్షా వచ్చే ప్లాన్ చేసుకుంటున్నారు. మే 6న బీఆర్ఎస్ అధినేత కేసీఆర్ టూర్ కూడా కన్ఫర్మ్ అయింది. అంతకు ముందు కేటీఆర్, హరీశ్ రావు రానున్నారు.
ఛాలెంజ్గా తీసుకున్న కాంగ్రెస్
ఇందూర్ పార్లమెంట్ లో గెలుపును కాంగ్రెస్ సవాల్గా తీసుకుంది. పాజిటివ్గా ఉన్న పరిస్థితులను మరింత మెరుగుపర్చుకోవడానికి కృషి చేస్తోంది. అసెంబ్లీ ఎన్నికల తరహాలో అన్ని విలేజ్లలో ప్రచారం చేయడం సాధ్యం కానందున ప్రత్యేక పంథాను ఎంచుకొంది. పార్లమెంట్ సెగ్మెంట్లో 750కు మించి గ్రామాలుండగా అన్నీ కవర్ అయ్యేలా రెండు స్టేట్ లెవల్, ఒకటి సెంట్రల్ పార్టీ సభ నిర్వహించే ప్లాన్ చేశారు. అందులో భాగంగా స్టేట్ పార్టీ కమిటీ తరఫున మొదట సీఎం రేవంత్రెడ్డి వస్తున్నారు. అభ్యర్థి జీవన్రెడ్డి నామినేషన్ వేయనున్న సందర్భంగా రేవంత్రెడ్డి టూర్ కన్ఫర్మ్ అయింది.
ర్యాలీ, సభ కోసం పార్లమెంట్ సెగ్మెంట్ లెవల్లో జనసమీకరణ చేస్తున్నారు. కాంగ్రెస్ ప్రచార కమిటీ చైర్మన్ మధుయాష్కీగౌడ్ తల్లి అనసూయ దినకర్మ ఈనెల 25న ఉంది. ఆ కార్యక్రమం ముగియగానే ఆయన కూడా ప్రచారంలోకి రానున్నారు. జిల్లా ఇన్ఛార్జ్ మంత్రి జూపల్లి కృష్ణారావుకు బాధ్యతలు అప్పగించారు. సెంట్రల్ కమిటీ తరఫున ఆర్మూర్లో భారీ బహిరంగ సభను మే మొదటి వారంలో పెట్టే ప్రయత్నాలు చేస్తున్నారు. అసెంబ్లీ లీడర్లతో కలిసి అభ్యర్థి జీవన్రెడ్డి రోడ్షో, కార్నర్ మీటింగ్లతో వీలైనన్నీ గ్రామాలు చుట్టేసేలా మున్ముందు ప్రచారం కార్యక్రమాలు డిజైన్ చేశారు.
పరువు నిలబెట్టుకోవాలని బీఆర్ఎస్
కాంగ్రెస్, బీజేపీ ముఖ్య నేతల సభల నేపథ్యంలో బీఆర్ఎస్ చీఫ్ కేసీఆర్ టూర్ కూడా కన్ఫర్మ్ అయింది. ఎన్నికల్లో కనీసం పరువు నిలబెట్టుకునే స్థానాలు గెలుపొందేలా ప్రయత్నాలు చేస్తున్నారు. మే 6న బస్ యాత్రతో ఇందూర్ వస్తున్నట్లు కేసీఆర్ షెడ్యుల్ విడుదలైంది. రోజంతా ఆయన ఇక్కడే ఉండి రాత్రి కూడా ఇక్కడే బస చేయనున్నారు.
స్థానం పదిలం చేసుకోడానికి బీజేపీ
పార్లమెంట్ స్థానంలో మరోసారి జెండా ఎగరేయాలని భావిస్తున్న బీజేపీ ఆ మేరకు వ్యూహాలు రచిస్తోంది. రెండోసారి పోటీ చేస్తున్న సిట్టింగ్ ఎంపీ అర్వింద్ తన స్థానం సుస్థిరం చేసుకోవడానికి సర్వశక్తులు ఒడ్డుతున్నారు. ఈనెల 19న పసుపు రైతులతో వెళ్లి సాదాసీదాగా ఒక సెట్ నామినేషన్ వేసిన అర్వింద్ 25 న మరో సెట్ నామినేషన్ వేయనున్నారు. ఈ సందర్భంగా భారీ ర్యాలీ, సభకు ఏర్పాట్లు చేశారు.
సెంట్రల్ రైల్వే మినిస్టర్ అశ్విన్ వైష్ణవ్ దీనికి అటెండ్ కానున్నారు. ప్రధాని మోదీ అక్టోబర్ 3న ఒకసారి నిజామాబాద్ వచ్చారు. 15 రోజుల కింద పార్లమెంట్ సెగ్మెంట్ పరిధిలోని జగిత్యాలకు వచ్చి ప్రచార సభలో పాల్గొన్నారు. ఇందూర్ గడ్డపై మరో ప్రచార సభకు ప్రధాని మోదీ ఓకే చెప్పగా ఇంకా డేట్ ఫిక్స్ కాలేదు. ఒకవేళ ఆయన రాలేని పక్షంలో హోం మంత్రి అమిత్షా సభ పక్కాగా ఉంటుందని బీజేపీ వర్గాలు అంటున్నాయి.
