గెలుపు కోసం ‘ఆత్మీయ’ రాగం

• కులసంఘాలతో ప్రధాన పార్టీల ఆత్మీయ సమావేశాలు
• ఆయావర్గాల మద్దతు కూడగట్టే ప్రయత్నం
• గంపగుత్త ఓట్లపై ఆశలు

కామారెడ్డి, వెలుగు: గెలుపే లక్ష్యంగా ఎన్నికల బరిలో దూసుకెళ్తున్న ప్రధాన పార్టీలు ఆయా కుల సంఘాలతో ఆత్మీయ సమ్మేళనాలు నిర్వహిస్తున్నారు. ఆయా వర్గాల ఓట్లను గంపగుత్తగా తమవైపు తిప్పుకుంటే విజయానికి మరింత చేరువైతామనే వ్యూహంతో గ్రామాలు, టౌన్​లలో కుల సంఘాలతో మీటింగ్​లు నిర్వహిస్తున్నారు. మీటింగ్​లు నిర్వహించడానికి వీలుకాని పక్షంలో కుల పెద్దలతో భేటీ అయ్యి మద్దతు కోరుతున్నారు. 

ఓట్లు ఎక్కువగా ఉన్న కుల సంఘాల ముఖ్యులు కీలకంగా వ్యవహరిస్తున్నారు. పొద్దంతా ప్రచారాలు నిర్వహిస్తున్న ఆయా పార్టీల క్యాండిడేట్లు రాత్రి సమయాల్లో సంఘాలతో సమావేశమవుతున్నారు. కొందరు బహిరంగంగా మీటింగ్​లు నిర్వహిస్తుంటే, మరికొందరు రహస్యంగా సమావేశమవుతున్నారు. కామారెడ్డి, ఎల్లారెడ్డి, బాన్సువాడ, జుక్కల్ ​నియోజకవర్గాల్లో కుల సంఘాల వారీగా ఓట్ల సమీకరణకు ప్రధాన పార్టీల నేతలు ఎత్తుగడలు వేస్తున్నారు. కామారెడ్డి, నిజామాబాద్​ అర్బన్​ సెగ్మెంట్లలో ఆయా కులాలకు గల్లీ సంఘాలు ఉన్నాయి. 

కామారెడ్డి నియోజకవర్గంలో బీఆర్ఎస్ తరఫున సీఎం కేసీఆర్, కాంగ్రెస్​తరఫున టీపీసీసీ ప్రెసిడెంట్​ రేవంత్​రెడ్డి బరిలో ఉండగా, బీజేపీ తరఫున ఉమ్మడి జిల్లా పరిషత్​మాజీ చైర్మన్ ​వెంకటరమణారెడ్డి పోటీలో ఉన్నారు. రెండు ప్రధాన పార్టీల స్టేట్​ చీఫ్​లు ముఖాముఖి తలపడుతుండడంతో ఇక్కడి ఎన్నిక రసవత్తరంగా మారింది. ఈ పరిస్థితుల్లో  గెలుపు కోసం అన్ని పార్టీల అభ్యర్థులు శ్రమిస్తున్నారు. బీఆర్ఎస్ తరఫున ఆ పార్టీ నేతలు కుల సంఘాల ప్రతినిధులు,  ప్రెసిడెంట్లు, సెక్రెటరీలతో సంప్రదింపులు చేశారు. 

కామారెడ్డి టౌన్​లో అధిక ఓట్లు ఉన్న  కుల సంఘాల వారితో మీటింగ్​లు పెట్టారు. వారికున్న సమస్యలను తెలుసుకోవడంతో పాటు పరిష్కరిస్తామంటూ హామీలు ఇస్తున్నారు. ఇటీవల ఓ పార్టీకి చెందిన ముఖ్యనేత ఓ కుల సంఘానికి చెందిన ముఖ్య లీడర్లతో పాటు, ఆ కుల సంఘానికి సంబంధించిన గల్లీ సంఘం ప్రెసిడెంట్లు, సెక్రెటరీలతోనూ సమావేశమై మద్దతు కోరారు. కాంగ్రెస్​ పార్టీ నేతలు కూడా వివిధ కులసంఘాల ముఖ్యులు, సభ్యులతో మీటింగ్​లు నిర్వహిస్తున్నారు. అధికారంలోకి వచ్చేది తామేనని, సమస్యలు పరిష్కరిస్తామంటూ హామీ ఇస్తున్నారు. బీజేపీ నేతలు సైతం మీటింగ్​లు నిర్వహించి మద్దతు కోరుతున్నారు.

మిగతా నియోజకవర్గాల్లోనూ..

ఎల్లారెడ్డి, బాన్సువాడ నియోజకవర్గాల్లోనూ అభ్యర్థులు సామాజికవర్గాల వారీగా మీటింగ్​లు నిర్వహిస్తున్నారు. కుల సంఘలకు హామీలిచ్చి వారి ఓట్లను గంపగుత్తగా తమ వైపు తిప్పుకునే ప్రయత్నం చేస్తున్నారు. ఓటేసి తమను గెలిపిస్తే కుల సంఘాల బిల్డింగ్​లు, ఇతర అభివృద్ధి పనులు చేస్తామంటూ హామీలు ఇస్తున్నారు.