- ప్రచారానికి రానున్న బడా లీడర్లు
- జోరందుకోనున్న ప్రచారం
- నేడు ప్రధాని మోదీ బహిరంగ సభ
కామారెడ్డి, వెలుగు: జహీరాబాద్ ఎంపీ స్థానాన్ని ప్రధాన పార్టీలు ప్రతిష్ఠాత్మకంగా తీసుకున్నాయి. ముఖ్యంగా కాంగ్రెస్, బీజేపీ పార్టీలు నువ్వానేనా అన్నట్లుగా పోరాడుతున్నాయి. సిట్టింగ్ స్థానాన్ని తిరిగి దక్కించుకునేందుకు బీఆర్ఎస్ ప్రయత్నిస్తోంది. ఈ క్రమంలో ఇక్కడ ఎలాగైనా గెలిచి తీరాలనే పట్టుదలతో నియోజకవర్గంపై అగ్రనేతలు గురి పెట్టారు. జహీరాబాద్పార్లమెంట్ పరిధిలో మూడు అసెంబ్లీ నియోజకవర్గాలు సంగారెడ్డి జిల్లాలో, మరో నాలుగు కామారెడ్డి జిల్లాలో ఉన్నాయి. ఒకచోట అగ్రనేతలతో పాటు మరికొన్ని ప్రాంతాల్లో ముఖ్య నేతలతో సభలు, కార్నర్ మీటింగ్లతో ఓటర్లను ఆకర్షించే పనిలో పడ్డాయి.
కాంగ్రెస్
జహీరాబాద్ లో గెలుపుపై కాంగ్రెస్ పార్టీ గట్టి ధీమాతో ఉంది. బీసీ వర్గానికి చెందిన సురేశ్ షెట్కార్ను అభ్యర్థిగా బరిలో నిలిపారు. 4 రోజుల క్రితం శంకరంపేటలో ఏర్పాటు చేసిన భారీ బహిరంగ సభకు సీఎం రేవంత్రెడ్డి హాజరయ్యారు. ఇక్కడకు జహీరాబాద్, నారాయన్ఖేడ్, అందోల్తో పాటు సమీపంలో ఉన్న కామారెడ్డి జిల్లాలోని జుక్కల్, ఎల్లారెడ్డి నుంచి ప్రజలు, పార్టీ శ్రేణులు భారీగా తరలివెళ్లారు. కామారెడ్డి జిల్లాలో కూడా రేవంత్రెడ్డితో సభ నిర్వహించనున్నారు. కామారెడ్డి, ఎల్లారెడ్డి నియోజకవర్గాలకు కలిపి సభను ప్లాన్ చేస్తున్నారు. బాన్సువాడ, జుక్కల్నియోజకవర్గాల్లో పార్టీ ముఖ్యనేతలతో కార్నర్ మీటింగ్లకు ప్రయత్నాలు చేస్తున్నారు. పార్టీ అగ్రనేతలను తీసుకురావటం ద్వారా ఓటర్లను భరోసా కల్పించి మెజార్టీ ఓట్లను సాధించవచ్చని కాంగ్రెస్ నేతలు భావిస్తున్నారు.
బీజేపీ
అసెంబ్లీ ఎన్నికల్లో ఓట్ల శాతం పెరగటంతో ఎంపీ స్థానం పరిధిలోని కామారెడ్డి సీటును బీజేపీ దక్కించుకుంది. జుక్కల్నియోజకవర్గం మహారాష్ర్ట, కర్నాటక బార్డర్లో ఉండటం, మోదీ చరిష్మా, అయోధ్యలో రామాలయం నిర్మాణ ప్రభావం అంశాలు ప్రభావం చూపనున్నాయి. వీటితో పార్లమెంట్పరిధిలో ఓటర్లను ప్రభావితం చేయటం ద్వారా ఇక్కడ కాషాయ జెండా ఎగురుతుందనే భావనలో బీజేపీ నేతలు ఉన్నారు. తమ పార్టీ అంతర్గత సర్వేల్లో ఇక్కడ గెలుస్తున్నామనే నమ్మకం ఆ పార్టీ నేతల్లో ఉంది. నేడు సంగారెడ్డి జిల్లాలోని అల్లాదుర్గ్లో భారీ సభ ఏర్పాటు చేస్తుండగా, ప్రధాని మోదీ వస్తున్నారు. కామారెడ్డి జిల్లాలోని 4 అసెంబ్లీ నియోజకవర్గ ఓటర్లను ప్రభావితం చేసేలా మరో అగ్రనేతలో సభ నిర్వహించేందుకు కసరత్తు చేస్తున్నారు.
బీఆర్ఎస్
అసెంబ్లీ ఎన్నికల ఫలితాల తర్వాత చతికిలబడిన బీఆర్ఎస్ ఎంపీ ఎన్నికల్లో మెజార్టీ స్థానాలు దక్కించుకొని తమ సత్తా చాటాలని ప్రయత్నిస్తోంది. వరుసగా 2 పర్యాయాలు జహీరాబాద్లో బీఆర్ఎస్ అభ్యర్థి బీబీ పాటిల్ గెలిచారు. ఈయన బీజేపీలో చేరి ఆ పార్టీ తరఫున పోటీ చేస్తుండడంతో.. బీఆర్ఎస్అభ్యర్థిగా గాలి అనిల్కుమార్ను బరిలో దించారు. ఆ పార్టీ అధినేత కేసీఆర్ చేపట్టిన బస్సు యాత్ర మే 7న కామారెడ్డికి రానుంది. జిల్లా కేంద్రంలో నిర్వహించే కార్నర్ మీటింగ్లోనూ కేసీఆర్పాల్గొననున్నారు. మిగతా నియోజకవర్గాల్లో మాజీ మంత్రులు కేటీఆర్, హరీశ్రావు ప్రచారం చేస్తారని ఆ పార్టీ నేతలు పేర్కొంటున్నారు. ఇప్పటికే కామారెడ్డి, ఎల్లారెడ్డి నియోజకవర్గాల పార్టీ మీటింగ్లకు హరీశ్హాజరయ్యారు. ఈ మేరకు అగ్రనేతల పర్యటనలతో ప్రచారం ఇక జోరుందుకోనుంది.
