సెంటర్తో తగాదాకి ఎప్పుడూ రెడీగా ఉండే ముఖ్యమంత్రిగా ఫైర్బ్రాండ్ మమతా బెనర్జీ పేరుబడ్డారు. బెంగాల్లో ఎన్నార్సీ అమలు చేస్తామనగానే పట్టుదలకు పోయారు. సీఏఏ పేరు చెబితే భగ్గున మండిపడుతున్నారు. లెఫ్ట్ ఫ్రంట్ని ఓడగొట్టి తృణమూల్ రెండుసార్లు పవర్లోకి రావడానికి ముస్లిం ఓట్లే కీలకం. అసెంబ్లీ ఎన్నికలకు ఇంకా ఏడాదిన్నర టైమ్ ఉన్నందువల్ల… హిందూ ఓట్ల శాతాన్ని పెంచుకోవటంపై దృష్టి పెట్టాలని తృణమూల్ సీనియర్లు సూచిస్తున్నారు.
సిటిజెన్షిప్ అమెండ్మెంట్ యాక్ట్పై ఏ ముఖ్యమంత్రీ లేనంత కసితో ఉన్నారు మమతా బెనర్జీ. ‘ఈ యాక్ట్ని పశ్చిమ బెంగాల్లోకి రానివ్వను. కాదు కూడదంటే, నా డెడ్బాడీ మీదనే అమలు చేయాలి’ అంటున్నారు. ఎందుకంత పట్టుదలగా ఉన్నారో ఒక పరిశీలించాలి. వెస్ట్ బెంగాల్ సీఎం, తృణమూల్ చైర్పర్సన్ అయిన మమతను రెండు భయాలు పీడిస్తున్నాయంటున్నారు విశ్లేషకులు. ముస్లిం డామినేటెడ్ నియోజకవర్గాల్లో బీజేపీ ఇప్పటికే పుంజుకుంది. తాను గెలుచుకున్న 18 ఎంపీ సీట్లలో ఎనిమిది బంగ్లాదేశ్ సరిహద్దుల్లోని లోక్సభ సెగ్మెంట్లు. మరోవైపున 2014లో 34 సీట్లు సాధించిన తృణమూల్ ఈసారి 22 సీట్లకు పడిపోయింది. ఇది మమతకుగల మొదటి భయం.
రెండోది నేషనల్ సిటిజన్షిప్ రిజిస్ట్రీ (ఎన్నార్సీ)తోపాటు కొత్తగా సిటిజెన్షిప్ అమెండ్మెంట్ యాక్ట్ (సీఏఏ)కూడా వచ్చేసింది. ఎన్నార్సీని దేశమంతా తెస్తామని కేంద్ర హోం మంత్రి అమిత్ షా ప్రకటించడం, సీఏఏ ద్వారా పశ్చిమ బెంగాల్లో పెద్ద సంఖ్యలో ఇల్లీగల్గా ఉంటున్న మైనారిటీలను ఏరివేసే అవకాశం ఉండడం. ఈ రెండు భయాలతోనే వెస్ట్ బెంగాల్ ఫైర్ బ్రాండ్ మమత కేంద్రంతో అమీతుమీకి రెడీ అవుతున్నారని ఎనలిస్టులు చెబుతున్నారు. దీనికి గ్రాస్ రూట్స్ దేశ విభజనలో ఉన్నాయి. ఈస్ట్ పాకిస్థాన్ వైపు వెళ్లిపోయిన బెంగాలీ ముస్లింలకు బెంగాల్లో చాలా భూములుండేవి. ఆ భూములన్నీ వెస్ట్ బెంగాల్ ప్రభుత్వం స్వాధీనం చేసుకుంది. వీళ్లు బంగ్లాదేశ్ యుద్ధ సమయంలో వెనక్కి వచ్చినా శరణార్థులుగా ఉన్నారు తప్ప, ఇండియన్ సిటిజెన్స్ కాలేకపోయారు. పశ్చిమ బెంగాల్లో లెఫ్ట్ ఫ్రంట్ జరిపిన భూపోరాటాల ఫలితంగా ముస్లింల భూములు నిరుపేద రైతులకు, దళితులకు పంపకమైపోయాయి. లెఫ్ట్ ఫ్రంట్ తన 34 ఏళ్ల పాలనలో జరిపిన భూ పంపిణీలతో ముస్లిం ఓటర్లు ఆల్టర్నేటివ్ కోసం ఎదురు చూశారు. ఆ సమయంలో తృణమూల్ కాంగ్రెస్ తరఫున గట్టిగా వాయిస్ వినిపిస్తున్న మమతను ‘దీదీ (అక్కయ్య)’గా ఆదరించారు. వీళ్ల ఓట్లన్నీ గంపగుత్తగా పడడంతో 2011, 2016ల్లో వరుసగా రెండుసార్లు తృణమూల్ ప్రభుత్వం ఏర్పడింది.
ఇప్పుడు గనుక సిటిజెన్షిప్ అమెండ్మెంట్ యాక్ట్ని, ఎన్నార్సీని పశ్చిమ బెంగాల్లో అమలు చేస్తే… ఈ ఓట్లు గల్లంతయ్యే ప్రమాదముందని మమత భయపడుతున్నారు. బంగ్లా స్వతంత్ర పోరాట సమయంలో అక్కడి నుంచి పొరుగున ఉన్న ఇండియాకి పెద్ద సంఖ్యలో హిందువులు సహా ముస్లిం తదితర మైనారిటీలు వచ్చేసి, వెనక్కి వెళ్లకుండా సెటిలైపోయారని చెబుతున్నారు. ఉత్తర వెస్ట్ బెంగాల్లోని జల్పాయ్గురి, అలీపూర్దౌర్, మాల్డా, ఉత్తర దినాజ్పూర్, దక్షిణ దినాజ్పూర్ జిల్లాల్లో ఎక్కువగా ఉంటారు. అలాగే, దక్షిణ వెస్ట్ బెంగాల్లోని నార్త్ 24 పరగణాలు, సౌత్ 24 పరగణాలు జిల్లాలుకూడా బెంగాలీ ముస్లింల ప్రాబల్యంతో ఉంటాయి. మొత్తంగా బంగ్లాదేశ్ని ఆనుకుని ఉన్న అసెంబ్లీ సెగ్మెంట్లలో 70 చోట్ల ఇప్పటి వరకు ముస్లిం మైనారిటీలకు చెందినవాళ్లే ఎమ్మెల్యేలుగా గెలుస్తున్నట్లు డేటా చెబుతోంది. అస్సాంలో మాదిరిగా పక్కాగా ఎన్నార్సీని చేపడితే వెస్ట్ బెంగాల్లో చాలామందికి సిటిజన్షిప్ గల్లంతవుతుంది. జల్పాయ్గురి, మాల్డా, రాయ్గంజ్, డార్జిలింగ్, 24 పరగణాలు వంటి జిల్లాల్లో సెటిలైన బంగ్లా వలసదారుల్ని పంపేయాల్సి వస్తుంది. బెంగాల్ ఓటర్లలో వీళ్లు చాలా కీలకమని, అందుకే ఎన్నార్సీ–సీఏఏలను తృణమూల్ అడ్డుకోవాలని చూస్తోందని బీజేపీ బాగా ప్రచారంలో పెట్టింది. బంగ్లా నుంచి వలస వచ్చినవాళ్లలో 20 శాతం మంది హిందువులు, 30% ముస్లింలు పశ్చిమ బెంగాల్లో ఉన్నట్లు అంచనా. ముస్లిం జనాభా ఈ యాభై ఏళ్లలోనూ బాగా పెరిగిందని లెక్కలు చెబుతున్నాయి.
బీజేపీ ఒక క్రమపద్ధతిలో తన స్ట్రేటజీని వెస్ట్ బెంగాల్లో అమలు చేస్తూ వస్తోంది. 2016 అసెంబ్లీ ఎన్నికల్లో కేవలం ముగ్గురు ఎమ్మెల్యేలను గెలిచిన బీజేపీ… ప్రస్తుతం 126 సెగ్మెంట్లలో బలంగా కనిపిస్తోంది. వీటిలో 56 సీట్లు బంగ్లా సరిహద్దుల్లో ఉన్నాయని గమనించాలి. బంగ్లా బోర్డర్ సీట్లలో సగానికి పైగా ముస్లిం ఓటర్లున్న రాయ్గంజ్ లోక్సభా సెగ్మెంట్కూడా ఇప్పుడు బీజేపీ చేతిలోనే ఉంది. గతంలో తృణమూల్కి గట్టి మద్దతుదార్లుగా ఉన్న మతువా కమ్యూనిటీ ఓట్లను బీజేపీ చీల్చుకోగలిగింది. వచ్చే అసెంబ్లీ ఎన్నికల్లో ముస్లింల ఓట్లు గనుక చీలిపోతే…. దీదీ పరిస్థితి తారుమారవుతుంది. తృణమూల్ పుట్టినప్పటినుంచీ లెఫ్ట్ ఫ్రంట్తో పోరాటానికే అన్ని శక్తులూ ధారపోసిందని, ఇప్పుడు కొత్తగా బీజేపీని డీకొట్టాల్సి వస్తోందని ఎనలిస్టులు అంటున్నారు. అసెంబ్లీ ఎన్నికలకు ఇంకా ఏడాదిన్నర టైమ్ ఉన్నందువల్ల… తృణమూల్ కేవలం ముస్లింల ఓట్లపైనే ఆశలు పెట్టుకోవద్దని, హిందూ ఓట్ల శాతాన్ని పెంచుకోవటంపై కూడా దృష్టి పెట్టాలని ఆ పార్టీ సీనియర్లు సూచిస్తున్నారు. లేనట్లయితే, తృణమూల్ పరిస్థితి రివర్స్ అవుతుందని హెచ్చరిస్తున్నారు.
రెండు పనుల్లో సక్సెసయితేనే…
మొత్తం ఇండియాలో ముస్లిం ఓటర్ల సగటు 14 శాతం. రాష్ట్రాలవారీగా చూసినప్పుడు పశ్చిమ బెంగాల్లో 31 శాతానికి పైగా ముస్లిం ఓటర్లుంటారు. అసెంబ్లీలోని 294 సీట్లలో దాదాపు 125 సీట్లలో ముస్లిం ఓట్లే డిసైడింగ్ ఫ్యాక్టర్గా ఉన్నాయి. వీళ్ల ఓట్లతోనే 2011, 2016 అసెంబ్లీ ఎన్నికల్లో తృణమూల్ అధికారం దక్కించుకుంది. 2019 లోక్సభ ఎన్నికలనాటికి పరిస్థితి తారుమారైంది. బంగ్లాదేశ్ బోర్డర్లోని 8 సీట్లు బీజేపీ ఖాతాలో పడ్డాయి. ఈ సీట్లు మైనారిటీల ఓట్లు ఎక్కువగా ఉన్నవి. బీజేపీని అడ్డుకోవడం, ముస్లిం మైనారిటీలకు తానే పెద్ద దిక్కని చాటుకోవడం మమత ముందున్న తక్షణ లక్ష్యాలు. ఈ రెండు పనుల్లోనూ సక్సెస్ అయితేనే 2021 శాసన సభ ఎన్నికల్లో మమతకు మళ్లీ గెలిచే ఛాన్స్ ఉంటుందని చెప్తున్నారు ఎనలిస్టులు.
