మెహిదీపట్నం, వెలుగు: ఓ వ్యక్తిని చంపి, ముక్కలు ముక్కలుగా చేసి, గోనె సంచిలో తీసుకొచ్చి దర్గా దగ్గర పడేసిన ఘటన లంగర్ హౌస్ పీఎస్ పరిధిలో జరిగింది. సీఐ శ్రీనివాస్ కథనం ప్రకారం.. గురువారం రాత్రి 10:30 గంటల తర్వాత దర్గా మిలట్రీ హాస్పిటల్సమీపంలో ఓ ఆటో ఆగింది. అందులో నుంచి ఓ వ్యక్తి, ఓ మహిళ దిగారు. గోనె సంచి తెచ్చి పడేస్తుండగా, స్థానికులు గమనించి ఏమిటి అని అడిగారు.
సమాధానం చెప్పకుండా ఇద్దరూ ఆటోలో అక్కడి నుంచి జారుకున్నారు. స్థానికులు వెంటనే పోలీసులకు సమాచారం ఇచ్చారు. పోలీసులు వచ్చి చూడగా గోనె సంచిలో డెడ్బాడీ ఉన్నట్లు గుర్తించారు. ముక్కలు, ముక్కలుగా నరికి పాలిథిన్ కవర్లో శరీర భాగాలను మూటగట్టినట్లు తెలిసింది.
వెంటనే వాటిని పోస్టుమార్టం కోసం ఉస్మానియా ఆసుపత్రికి తరలించారు. కేసు నమోదు చేసుకొని, డెడ్బాడీ ఎవరిదో, తెచ్చి పడేసింది ఎవరో అనే దానిపై దర్యాప్తు చేస్తున్నారు.
