- ఆపై తానూ ఆత్మహత్య, మధ్యప్రదేశ్లోని చింద్వారాలో ఘోరం
- నిందితుడిని మానసిక రోగిగా గుర్తించిన పోలీసులు
చింద్వారా : మధ్యప్రదేశ్లో దారుణం జరిగింది. ఓ వ్యక్తి తన కుటుంబంలోని 8 మందిని నరికి చంపేశాడు. ఆపై ఉరేసుకుని ఆత్మహత్య చేసుకున్నాడు. బుధవారం తెల్లవారుజామున ఈ ఘటన జరిగింది. చింద్వారా జిల్లాలోని గిరిజన గ్రామమైన బోదల్ కచర్కు చెందిన దినేశ్ సరియం అలియాస్ భురా(26) తెల్లవారుజామున 2.30 గంటల సమయంలో కుటుంబ సభ్యులంతా నిద్రలో ఉండగా ఈ అఘాయిత్యానికి పాల్పడ్డాడు. మొదట అతని తల్లి సియాబాయి(55), అన్న శ్రవణ్కుమార్(35), వదిన బారతోబాయి(30), భార్య వర్ష(23)పై గొడ్డలితో దాడి చేశాడు. ఆపై తన 16 ఏండ్ల చెల్లి పార్వతి, మేనల్లుడు కృష్ణ(5), మేనకోడళ్లు సెవుంటి(4), దీప(1)ను నరికి చంపేశాడు. అనంతరం పక్కింట్లో ఉండే ఓ పదేండ్ల చిన్నారిపైనా దాడి చేసేందుకు ప్రయత్నించగా ఆ పాప తప్పించుకుంది. బాధితుల కేకలు విని ఇరుగుపొరుగువారు ఆ చిన్నారి ఇంట్లోకి రాగా వాళ్లను చూసి దినేశ్ పారిపోయాడు. చుట్టుపక్కలవాళ్లంతా అతడి గురించి వెతుకుతుండగా దగ్గర్లోని ఓ చెట్టుకు దినేశ్ ఉరేసుకుని ఆత్మహత్య చేసుకుని ఉండటాన్ని గమనించారు.
నిందితుడికి ఈ మధ్యే పెండ్లి..
సమాచారమివ్వడంతో పోలీసులు స్పాట్కు చేరుకున్నారు. 8 మంది చనిపోయినట్లు గుర్తించారు. నిందితుడు స్కిజోఫ్రెనియా అనే మానసిక వ్యాధిగ్రస్తుడని, గతంలోనూ ట్రీట్మెంట్ తీసుకున్నాడని చింద్వారా జిల్లా ఎస్పీ తెలిపారు. ఈ వ్యాధితో ఉన్నవాళ్లు ఇతరులపై దాడి చేయొచ్చని డాక్టర్ల ద్వారా తెలుసుకున్నామన్నారు. అయితే, ఇలాంటి వ్యాధితో బాధపడుతున్న నిందితుడికి ఈ నెల 21న పెండ్లి కావడంపై పోలీసులు ఆశ్చర్యం వ్యక్తం చేశారు. కాగా, ఈ ఘటనపై మధ్యప్రదేశ్ సీఎం మోహన్ యాదవ్ విచారం వ్యక్తం చేశారు.
