డీజే సౌండ్ తగ్గించమన్నందుకు కొట్టి చంపిన్రు

డీజే సౌండ్ తగ్గించమన్నందుకు కొట్టి.. మీదెక్కి డ్యాన్సు చేసి చంపిన్రు
ఊపిరాడక పోయిన ప్రాణం
నిర్మల్ జిల్లా దిలావర్ పూర్ లో దారుణం
పోలీసుల అదుపులో ఆరుగురు నిందితులు

నర్సాపూర్( జి) వెలుగు: నిర్మల్ జిల్లా దిలావర్ పూర్ మండలం కాల్వతండాలో డీజే సౌండ్ తగ్గించమని అడిగినందుకు ఓ యువకుడిని చితకబాది మీదెక్కి డ్యాన్స్ చేయడంతో ఊపిరాడక చనిపోయాడు. గ్రామస్థులు, పోలీసుల కథనం ప్రకారం...కాల్వతండా గ్రామానికి చెందిన రెండు కుటుంబాల్లో యువకులకు వేరే ఊర్ల అమ్మాయిలతో బుధవారం పెండ్లిళ్లు జరిగాయి. రాత్రి బారాత్ పెట్టుకున్నారు. తొమ్మిది, పది గంటల మధ్య రెండు కుటుంబాలకు చెందిన రెండు డీజేలను ఊర్లోకి తీసుకువచ్చారు. వచ్చినప్పటి నుంచే పెద్ద సౌండ్తో పాటలు పెట్టి డ్యాన్సులు చేయడం స్టార్ట్ చేశారు. సాయికుమార్అనే యువకుడి పెండ్లికి బంధువులు , ఫ్రెండ్స్ పెద్ద సంఖ్యలో రావడంతో డీజే ఆపరేటర్ మాగ్జిమమ్ సౌండ్ పెట్టాడు. దీంతో ముందు మరో పెండ్లిలో డ్యాన్సులు చేస్తున్న వారు కూడా ఇక్కడికే వచ్చారు. అప్పటికే రాత్రి 11: 30 కావస్తోంది. బారాత్ జరిగే చోట ఓ ఇంట్లో నాలుగేండ్ల చిన్నారితోపాటు, మూడు నెలల పాప ఉన్నారు. వీరు శబ్దాన్ని భరించలేక పెద్దపెట్టున ఏడ్వడం మొదలుపెట్టారు. ఇది చూసిన వారి తండ్రి మెగావత్ నవీన్ కుమార్(28) బయటకు వచ్చి పిల్లలు ఏడుస్తున్నారని, సౌండ్ తగ్గించాలని కోరాడు.

కొట్టి..పైన డ్యాన్స్చేసి...
పెండ్లికి వచ్చిన వారు మద్యం మత్తులో ఉండడం తో నవీన్ ఎంత చెప్తున్నా వినిపించుకోలేదు. సౌండ్ తగ్గించేది లేదని, ఏం చేస్కుంటావో చేస్కొ మ్మని మరింత సౌండ్ పెంచారు. గట్టిగా అడగడంతో ‘మాకే చెప్తావ్ రా’ అంటూ ఇష్టమున్నట్టు కొట్టారు. అంతటితో వదిలేయకుండా సుమారు 15 మంది కింద పడేసి తొక్కుతూ డ్యాన్స్ చేశారు. దీంతో ఊపిరాడక స్పృహ కోల్పోయాడు. బంధువులు నిర్మల్ దవాఖానాకు తరలించగా అప్పటికే చనిపోయాడని డాక్టర్లు నిర్ధారించారు. నవీన్ కొన్నేండ్ల కిందే హైదరాబాద్లో బీటెక్ కంప్లీట్చేసి ఊరికి వచ్చాడు. పెండ్లి చేసుకుని భార్యాపిల్లలతో గ్రామంలో ఉంటున్నాడు.

సీసీ టీవీ ఫుటేజీలు పరిశీలించి...
నవీన్ కుటుంబసభ్యులు ఫిర్యాదు చేయడంతో పోలీసులు గ్రామానికి వెళ్లి సీసీ ఫుటేజీలు పరిశీలించారు. దాని ఆధారంగా సాయికుమార్ఫ్రెండ్స్అయిన ఆరుగురిని అదుపులోకి తీసుకున్నారు. రెండు డీజేలను సీజ్చేశారు. ఈ సందర్భంగా ఎస్ఐ గంగాధర్ మాట్లాడుతూ డీజేలకు పర్మిషన్ లేదని, అయినా ఈ మధ్య పట్టణాల్లో, గ్రామాల్లో డీజేలు పెడుతూ ఇబ్బందులు పెడుతున్నట్టు తమ దృష్టికి వచ్చిందన్నారు. వీటి విషయంలో సీరియస్ యాక్షన్ తీసుకుంటామన్నారు.