ఇదో రకం మోసం.. సౌదీ కరెన్సీ ఆశచూపి..రూ.2.80లక్షలు కొట్టేశారు

• ఇండియన్ కరెన్సీకి సౌదీ కరెన్సీ ఇస్తామని..తెల్ల కాగితాలు చేతిలో పెట్టారు..
• కర్చీప్ లు అమ్ముకునే వ్యక్తిని నమ్మి, రూ.2.80 లక్షలు మోసపోయిన బాధితుడు

ఉప్పల్, వెలుగు: ఇండియన్ కరెన్సీ ఇస్తే ఎక్కువ మొత్తంలో సౌదీ కరెన్సీ ఇస్తానని ఆశ చూపి, ఓ వ్యక్తి ఇద్దరు దుండగులు మోసం చేశారు. రూ.2.80 లక్షలు తీసుకొని, చేతిలో పేపర్ కట్టలు పెట్టి బురిడీ కొట్టించారు. ఉప్పల్​పరిధిలో జరిగిన ఈ ఘటన వివరాలు ఇలా ఉన్నాయి. కార్వాన్​కు చెందిన మహ్మద్ హైమద్​కు అదే ప్రాంతంలో కర్చీప్ లు అమ్ముకునే వ్యక్తి మంగళవారం పరిచయమయ్యాడు. 

తన వద్ద సౌదీకి చెందిన నోట్ల కట్టలు 14 బండిల్స్ ఉన్నాయని, వాటి విలువ ఇండియన్ కరెన్సీలో దాదాపు రూ.7 లక్షల వరకు ఉంటుందని మాయ మాటలు చెప్పాడు. ఆ తర్వాత ఒక సౌదీ నోటును చూపించి నమ్మించాడు. రూ.2.80 లక్షల ఇండియన్ కరెన్సీ ఇస్తే, తన వద్ద ఉన్న మొత్తం సౌదీ కరెన్సీ ఇస్తానని ఆశచూపాడు. దీంతో బాధితుడు హైమద్ బుధవారం ఉదయం 8 గంటలకు కర్చీప్స్ అమ్ముకునే సదరు వ్యక్తికి ఫోన్ చేశాడు. అయితే, సౌదీ కరెన్సీ ఉప్పల్​లో ఉండే తన స్నేహితుడి వద్ద ఉందని అక్కడికి తీసుకెళ్లాడు. 

అనంతరం హైమద్ తన కూతురు పెళ్లి కోసం దాచి పెట్టిన డబ్బులను దుండగులకు అందజేశారు. దీంతో దుండగులు ఆ డబ్బును తీసుకొని, న్యూస్ పేపర్​లో చుట్టిన బండిల్స్ ను రుమాలులో చుట్టి బాధితుడికి ఇచ్చి జారుకున్నారు. ఆ తర్వాత కొద్ది దూరం వచ్చి బండిల్ విప్పి చూడగా, అందులో తెల్ల కాగితాలు ఉండడంతో కంగుతున్న బాధితుడు వెంటనే ఉప్పల్ పోలీసులను ఆశ్రయించాడు. దీంతో కేసు నమోదు చేసి దర్యాప్తు చేస్తున్నామని ఉప్పల్ సీఐ ఎలక్షన్ రెడ్డి తెలిపారు.