కొత్తపల్లి, వెలుగు : చొప్పదండి ఎమ్మెల్యే మేడిపల్లి సత్యంను బెదిరించిన కేసులో నిందితుడిని అరెస్ట్ చేసి రిమాండ్కు పంపినట్లు కరీంనగర్ రూరల్ ఏఎస్పీ శుభం ప్రకాశ్ తెలిపారు. ఆయన తెలిపిన వివరాల ప్రకారం.. చొప్పదండి ఎమ్మెల్యే మేడిపల్లి సత్యంకు గత ఏడాది సెప్టెంబర్ 28న రంగారెడ్డి జిల్లా బోడుప్పల్లోని భవానీనగర్కు చెందిన యాస అఖిలేష్ రెడ్డి(33) +447886696497 నంబర్ నుంచి వాట్సాప్ కాల్ చేసి బెదిరించాడు. రూ.20 లక్షలు ఇవ్వాలని లేకపోతే రాజకీయంగా అప్రతిష్టపాలు చేస్తానని, ఇద్దరు పిల్లలు అనాథలయ్యేలా చేస్తానని బెదిరింపులకు దిగాడు.
దీనిపై ఎమ్మెల్యే కొత్తపల్లి పోలీస్ స్టేషన్లో ఫిర్యాదు చేయగా వివిధ సెక్షన్ల కింద కేసు నమోదు చేసి దర్యాప్తు చేశారు. నిందితుడు లండన్ ఫోన్ చేసి బెదిరించినట్లు గుర్తించారు. నిందితుడిపై లుక్ అవుట్ సర్క్యులర్ జారీ చేశారు. ఈ నెల 9న బెంగళూరు ఎయిర్పోర్టుకు నిందితుడు రాగా, ఇమ్మిగ్రేషన్ అధికారులు అఖిలేష్ రెడ్డిని అదుపులోకి తీసుకుని కొత్తపల్లి ఎస్సైకి సమాచారం అందించారు. నిందితుడిని కరీంనగర్ తీసుకొచ్చి, రిమాండ్ కు తరలించారు.
