హైదరాబాద్, వెలుగు: ఆర్టీసీలో కండక్టర్లకు ప్రస్తుతం కొనసాగుతున్న ఓడీ (అవుట్ ఆఫ్ డిజిగ్నేషన్) డ్యూటీలను విరమించుకుంటున్నట్లు యాజమాన్యం ప్రకటించింది. ఈ మేరకు శుక్రవారం చీఫ్ పర్సనల్ మేనేజర్ పేరుతో లేఖ జారీ చేసింది. ఇక నుంచి రాష్ట్ర వ్యాప్తంగా అన్ని ఆర్టీసీ డిపోలు, యూనిట్లలో ఓడీ డ్యూటీ చేస్తున్న కండక్టర్లను ఆ విధుల నుంచి తప్పించాలని ఆయా జిల్లాల ఆర్టీసీ అధికారులను ఆదేశించింది.
కొంత కాలంగా కొందరు కండక్టర్లు డిపోలు, యూనిట్లలో ఓడీలో భాగంగా సెక్యూరిటీ డ్యూటీలు చేస్తున్నారు. కాగా, రాష్ట్ర వ్యాప్తంగా కండక్టర్ల కొరత ఉన్న దృష్ట్యా వారికి ఓడీ డ్యూటీల నుంచి తప్పిస్తున్నట్లు ఆర్టీసీ యాజమాన్యం తెలిపింది.
