- సిరిసిల్లలో రూ.13 వేలు తీసుకుంటూ పట్టుబడిన ఉపేందర్ రావు
రాజన్న సిరిసిల్ల, వెలుగు : రాజన్న సిరిసిల్ల పరిశ్రమల శాఖ మేనేజర్ ఉపేందర్ సోమవారం ఏసీబీకి చిక్కాడు. ఓ మహిళ వద్ద రూ.13వేలు లంచం తీసుకుంటుండగా రెడ్హ్యాండెడ్గా పట్టుకున్నారు. వీర్నపల్లి మండల కేంద్రానికి చెందిన భూక్యా సరిత సబ్సిడీ కింద టిప్పర్ తీసుకున్నారు. అయితే, ఆ సబ్సిడీకి సంబంధించి వెరిఫికేషన్ జరుగుతోంది. కానీ, సబ్సీడీ రావాలంటే రూ.30 వేలు లంచం ఇవ్వాలని జిల్లా పరిశ్రమల శాఖ అధికారి ఉపేందర్ రావు డిమాండ్చేశాడు.
దీంతో సరిత ఏసీబీ అధికారులను ఆశ్రయించారు. సోమవారం సిరిసిల్లలోని గీతానగర్ జడ్పీ హైస్కూల్లో ఉపేందర్రావు ఎలక్షన్ డ్యూటీలో ఉండగా భూక్య సరిత మరిది వెంకటేశ్ అతడికి కాల్ చేశాడు. దీంతో బయటకు వచ్చి డబ్బులు తీసుకుంటుండగా ఏసీబీ అధికారులు పట్టుకున్నారు. కేసు నమోదు చేశామని, నిందితుడిని కోర్టులో హాజరుపరచనున్నట్టు ఏసీబీ కరీంనగర్ డీఎస్పీ రమణ మూర్తి తెలిపారు.
