కోల్బెల్ట్, వెలుగు: ప్రపంచమంతా ఆర్థిక మాంద్యంతో ఇబ్బందులు పడుతున్న సమయంలో.. ఆ ప్రభావం మన దేశంపై పడకుండా చూసిన గొప్ప ఆర్థికవేత్త మాజీ ప్రధాని మన్మోహన్సింగ్అని చెన్నూరు ఎమ్మెల్యే వివేక్ వెంకటస్వామి అన్నారు. ఆర్థిక మంత్రిగా, దేశప్రధానిగా మన్మోహన్ సింగ్ ఎన్నో సంస్కరణలు, పాలసీలు అమలు చేసి దేశాన్ని అభివృద్ధి పథంలో నడిపారని గుర్తుచేశారు. దుబాయ్లో ఏర్పాటు చేసిన మాజీ ప్రధాని మన్మోహన్ సింగ్ సంతాపసభకు ఎమ్మెల్యే వివేక్ ముఖ్య అతిథిగా హాజయ్యారు. మన్మోహన్ ఫొటోకు పూలమాల వేసి నివాళులర్పించారు.
అనంతరం వివేక్ వెంకటస్వామి మాట్లాడుతూ.. దేశ ఎకానమీ వేగంగా అభివృద్ధి చెందేందుకు వీలుగా1991లో అప్పటి ప్రధాని పీవీ నరసింహారావు ప్రభుత్వం ప్రవేశపెట్టిన ఆర్థిక సంస్కరణలకు ఆధ్యుడిగా మన్మోహన్ సింగ్ పేరు పొందారన్నారు. దేశంలో తీవ్రమైన ఆర్థిక సంక్షోభం ఉన్న సమయంలో ఆర్థిక మంత్రిగా బాధ్యతలు చేపట్టి.. మూడు వారాల ఫారిన్ రిజర్వులను బ్యాలెన్స్ చేస్తూ పరిస్థితిని గాడిలో పెట్టి.. దేశం దివాలా తీసే పరిస్థితి నుంచి గట్టెక్కించారని గుర్తుచేశారు. 2008లో ప్రపంచమంతా ఆర్థిక మాంద్యంతో ఇబ్బందులు పడుతుంటే ఆ ప్రభావం దేశంపై పడకుండా చూసిన ఘనత పీవీకే సొంతమన్నారు. తన తండ్రి కాకా వెంకటస్వామి అప్పటి ప్రధాని పీవీ నర్సింహారావు కేబినెట్లో మంత్రిగా ఉన్నారని, ఆయన ఎప్పుడూ పేద ప్రజల కోసం ఆలోచించేవారన్నారు. కాకా వెంకటస్వామితో మన్మోహన్ సింగ్కు మంచి స్నేహం ఉందని గుర్తుచేశారు.
ఆర్థిక సంస్కరణలు అమలు చేస్తున్న సమయంలో గ్రామీణ, మారుమూల ప్రాంత పేదలు ఎదుర్కొంటున్న ఇబ్బందులు తీర్చాలని కాకా కోరడంతో.. వారిని ఆదుకునేందుకు మన్మోహన్ సింగ్రూ.5 వేల కోట్ల నుంచి రూ.25 వేల కోట్లతో రూరల్ డెవలప్మెంట్ ఫండ్ ప్రతిపాదించారని పేర్కొన్నారు. ఎన్ని సంస్కరణలు తీసుకువచ్చినా, సామాన్యులకు కష్టం కలగకుండా చూశారన్నారు. మన్మోహన్ సింగ్ ప్రధానిగా ఉన్నహయాంలో దేశం ఆర్థికంగా అనూహ్య వృద్ధిని నమోదు చేసిందని, ప్రపంచంలోనే అత్యంత వేగంగా ఎదుగుతున్న ఆర్థిక వ్యవస్థగా భారత్ను నిలబెట్టిన ఘనత ఆయనకు దక్కుతుందని వివేక్ కొనియాడారు.
