ముంబై: దేశ ఆర్థిక రాజధాని ముంబైలో ఒళ్లు గగుర్పొడిచే ఘటన వెలుగు చూసింది. ఓ వ్యక్తిని అత్యంత కిరాతకంగా ముక్కలు ముక్కలుగా నరికి దుండగులు హత్య చేశారు. శరీర అవయవాలను ప్లాస్టిక్ బ్యాగ్‌లో పెట్టి నిత్యం పర్యాటకులతో రద్దీగా ఉండే ముంబైలోని గోరై బీచ్‌లో పడేశారు. బీచ్‌లో అనుమానస్పదంగా బ్యాగ్ కనిపించడంతో స్థానికులు పోలీసులకు సమాచారం అందించారు. వెంటనే ఘటన స్థలానికి చేరుకున్న పోలీసులు బ్యాగ్ ఓపెన్ చేసి చూసి ఒక్కసారిగా షాక్కు గురి అయ్యారు. బ్యాగులో ముక్కలు ముక్కలుగా ఉన్న మనిషి బాడీ పార్ట్స్ చూసి ఖంగుతిన్నారు.
ప్లాస్టిక్ బ్యాగ్‌లో మొత్తం ఏడు ముక్కలుగా శరీర అవయవాలు లభ్యం అయినట్లు పోలీసులు తెలిపారు. ప్లాస్టిక్ సంచిలోంచి బయటపడిన మృతదేహాన్ని పోస్టుమార్టం కోసం ఆసుపత్రికి తరలించారు. మృతుడు ఎవరన్నది ఇంకా గుర్తించలేదని పోలీసులు వెల్లడించారు. స్థానికులను భయబ్రాంతులకు గురి చేసిన ఈ ఘటనపై కేసు నమోదుచేసి దర్యాప్తు చేస్తున్నట్లు తెలిపారు. మృతుడి వివరాలు సేకరించేందుకు బీచ్ సమీపంలోని సీసీ కెమెరాలను పరిశీలిస్తున్నామని వెల్లడించారు. కాగా, ఈ ఘటనకు సంబంధించిన పూర్తి వివరాలు తెలియాల్సి ఉంది.
