జవహర్ నగర్, వెలుగు: విద్యుత్ అధికారుల నిర్లక్ష్యంతో నిండు ప్రాణం బలైంది. ఆకస్మత్తుగా సప్లై రావడంతో కరెంట్పోల్పై పనిచేస్తున్న కార్మికుడు మృతి చెందాడు. ఖమ్మం జిల్లా కామేపల్లి మండలం గోవింద్రాల బంజార్ తండాకు చెందిన బానోత్ ప్రశాంత్(26) ఉపాధి కోసం సిటీకి వచ్చాడు.
నిండు గర్భిణి అయిన తన భార్య సరితతో కలిసి జవహర్ నగర్లోని సంతోష్ నగర్లో నివాసం ఉంటూ.. విద్యుత్ శాఖలో ప్రైవేటు కార్మికుడిగా పనిచేస్తున్నాడు. శుక్రవారం ఉదయం సంతోష్ నగర్ లో కరెంట్పోల్పై వైర్లు మార్చుతుండగా, ఆకస్మత్తుగా సప్లై రావడంతో కిందపడి మృతి చెందాడు.
విద్యుత్ అధికారుల నిర్లక్ష్యంతోనే తన భర్త మృతి చెందాడని సరిత ఇచ్చిన ఫిర్యాదుతో పోలీసులు కేసు నమోదు చేసి దర్యాప్తు చేస్తున్నారు.
