- రౌండ్ టేబుల్ సమావేశంలో వక్తలు
బషీర్బాగ్, వెలుగు: నక్సలిజాన్ని నిర్మూలిస్తామనే హక్కు రాజ్యానికి(ప్రభుత్వానికి) లేదని పలువురు వక్తలు అభిప్రాయపడ్డారు. ప్రభుత్వానికి, మావోయిస్టుల మధ్య శాంతి చర్చలు జరిగితే సమాజానికి, దేశానికి మేలు జరుగుతుందన్నారు. హైదరాబాద్ బషీర్ బాగ్ ప్రెస్ క్లబ్లో పీస్ డైలాగ్ కమిటీ(శాంతి చర్చల కమిటీ) ఆధ్వర్యంలో 'కేంద్ర ప్రభుత్వానికి, మావోయిస్టు పార్టీ మధ్య చర్చలు' అనే అంశంపై జస్టీస్ బి.చంద్రకుమార్ అధ్యక్షతన రౌండ్ టేబుల్ సమావేశం జరిగింది.
ఈ సందర్భంగా ప్రొఫెసర్ జి.హరగోపాల్ మాట్లాడుతూ..నాడు రాజ్యం అమాయక పౌరులను కాల్చి చంపి భూటకపు ఎన్ కౌంటర్లుగా చిత్రికరించిందని ఆరోపించారు. నేడు చత్తీస్ గఢ్ రాష్ట్రంలోని ఆదివాసీల ఆధీనంలో ఉన్న ఖనిజ సంపదను దోచుకోవడానికి అమాయకులైన ఆదివాసీలను మావోయిస్టు పేరుతో హత్యలు చేస్తుందన్నారు. కార్పోరేట్ సంస్థలకు ఖనిజ సంపదను దోచిపెట్టడం కోసమే కేంద్ర హోం శాఖ మంత్రి అమిత్ షా 2026 నాటికి మావోయిస్టులను నిర్మూలిస్తామని బహిరంగంగా పార్లమెంట్ వేదికగా ప్రకటన చేయడం దారుణమన్నారు.
చత్తీస్ గఢ్సీఎం , కేంద్ర హోం శాఖ మంత్రి కలయిక చర్చలకు అమోదిస్తారా అన్న విషయం అనుమానంగా ఉందన్నారు. పౌర సమాజం, మేధావులు, కవులు సమాజంలోకి లోతుగా తీసుకువెళ్లినప్పుడే శాంతి చర్చలు జరిగే అవకాశం ఉందన్నారు. అల్లం నారాయణ మాట్లాడుతూ.. చత్తీస్ గఢ్ లో జరుగుతున్న పరిణామాల నేపథ్యంలో చర్చల ప్రతిపాదన వస్తున్నదని చెప్పారు.
సమావేశంలో ప్రముఖ పాత్రికేయులు కె.శ్రీనివాస్, సాధినేని వెంకటేశ్వర్ రావు, జీవన్, గాదె ఇన్నయ్య, చంద్రశేఖర్, ప్రొఫెసర్ తిరుమల్, బాలకిషన్ రావు, తిరుపతి, ప్రొఫెసర్ వినాయకరెడ్డి, ప్రొఫెసర్ అన్వర్ ఖాన్ తదితరులు పాల్గొన్నారు.
