- నాగర్ కర్నూల్ ఎమ్మెల్యే మర్రి వివాదస్పద వ్యాఖ్యలు
నాగర్ కర్నూల్, వెలుగు: మాజీ మంత్రి నాగం జనార్దన్ రెడ్డి, ఎమ్మెల్సీ కూచుకుళ్ల దామోదర్రెడ్డిలపై నాగర్ కర్నూల్ ఎమ్మెల్యే మర్రి జనార్దన్ రెడ్డి వివాదస్పద వ్యాఖ్యలు చేశారు. ఐటీ రైడ్స్ తర్వాత మంగళవారం తిమ్మాజీపేట నుంచి భారీ ర్యాలీతో జిల్లా కేంద్రానికి వచ్చిన ఆయన ఓపెన్ టాప్ వెహికిల్లో రోడ్షో నిర్వహించారు. ఈసందర్భంగా కార్లు, బైక్ ర్యాలీ మధ్య గజమాలలు వేసి క్షీరాభిషేకం చేశారు.
ఈసందర్భంగా ఆయన మాట్లాడుతూ.. 90 ఏండ్లు దాటిన ముసలోళ్లకు పెండ్లి చేస్తే ఏం చేస్తరని ప్రశ్నిస్తూ ‘‘నాకు చేయండి నేనేందో చూపిస్తా’’ అని నాగం, కూచుకుళ్లను ఉద్దేశించి కామెంట్ చేశారు. ఇద్దరూ అధికారంలో ఉండి నాగర్ కర్నూల్కు చేసిందేమిలేదని సెటైర్లు వేశారు. 60 ఏండ్లు అధికారంలో ఉండి ఈ ప్రాంతానికి ఏం చేశారని నిలదీశారు. తనను గెలిపిస్తే మంత్రినై మరింత అభివృద్ధి చేస్తా అని హామీ ఇచ్చారు. బీజేపీ, కాంగ్రెస్ కుట్రల వల్లే ఐటీ రైడ్స్ జరిగాయని ఆరోపించారు. ఐటీ అధికారులు తనకు క్లీన్చిట్ ఇచ్చారని చెప్పుకున్నారు. ఎమ్మెల్సీ కూచుకుళ్ల దేనికోసం పార్టీ మారుతున్నారో ప్రజలకు చెప్పాలని డిమాండ్ చేశారు.
