హైదరాబాద్: అనేక ఆందోళనలు, నిరసనల అనంతరం.. న్యాయస్థానాల ఆదేశాలతో తెలంగాణలో తొలిసారిగా గ్రూప్-1 మెయిన్స్ పరీక్షలు జరుగుతున్నాయి. 2024, అక్టోబర్ 22 నుండి మొదలైన గ్రూప్-1 మెయిన్స్ పరీక్షలు.. ఈ నెల 27వ తేదీ వరకు జరగనున్నాయి. ఇందులో భాగంగా శుక్రవారం (అక్టోబర్ 25) నాలుగవ రోజు ఎకానమీ అండ్ డెవలప్మెంట్ ఎగ్జామ్ జరిగింది. అయితే, స్కూల్, కాలేజీల్లో కొందరు విద్యార్థులు చిట్టీలు (మాస్ కాపీయింగ్) కొట్టినట్లుగా.. స్టేట్ లెవల్లో హయ్యర్ ప్రవేశపరీక్ష అయిన గ్రూప్ 1 ఎగ్జామ్లో ఓ అభ్యర్థిని కాపీయింగ్కు పాల్పడి అడ్డంగా దొరికిపోయింది.
వివరాల ప్రకారం.. రంగారెడ్డి జిల్లా ఇబ్రహీంపట్నం మండలం మంగల్ పల్లిలోని సీవీఆర్ ఇంజినీరింగ్ కళాశాలలో గ్రూప్-1 మెయిన్స్ పరీక్షలో కాపీయింగ్కు పాల్పడుతూ మహిళా అభ్యర్థిని అధికారులకు పట్టుబడింది. చీర కొంగులో చిట్టీలు తీసుకొచ్చి మాస్ కాపీయింగ్కు పాల్పడుతుండగా గుర్తించిన ఇన్విజిలేటర్ అధికారులకు సమాచారం అందించారు.
ALSO READ | మూసీ పునరుజ్జీవం ప్రపంచంలోనే అతిపెద్ద స్కామ్: బండి సంజయ్
ఈ మేరకు అధికారులు పోలీసులకు సమాచారం ఇవ్వగా.. మాస్ కాపీయింగ్కు పాల్పడిన అభ్యర్థిని వెంటనే పోలీసులు అదుపులోకి తీసుకున్నారు. కాగా, కాపీయింగ్ పాల్పడిన అభ్యర్థినిది మహబూబ్ నగర్ జిల్లా , పెద్ద మందాడి మండలంగట్ల ఖానాపూర్ గ్రామమని సమాచారం. ఆమె ప్రభుత్వ ఉద్యోగి అని తెలిసింది. కాగా, ఈ ఘటనకు సంబంధించిన పూర్తి వివరాలు తెలియాల్సి ఉంది.
