- బిహార్లోని పాట్నాలో రాకేశ్ రంజన్ను అదుపులోకి తీసుకున్న సీబీఐ
- పాట్నా, కోల్కతాలోని పలు ప్రదేశాల్లో సోదాలు
- కేసుకు సంబంధించి కీలక డాక్యుమెంట్లు స్వాధీనం
- 10 రోజుల కస్టడీ విధించిన లోకల్ కోర్టు
- సుప్రీంకోర్టులో విచారణ ఈ నెల 18కి వాయిదా
పాట్నా: నీట్యూజీ పేపర్ లీకేజీ కేసులో కేంద్ర దర్యాప్తు సంస్థ సీబీఐ దూకుడు పెంచింది. బిహార్ రాజధాని పాట్నాలో ఈ కేసుకు సంబంధించిన కీలక సూత్రధారిని గురువారం అరెస్ట్ చేసింది. అనంతరం పాట్నాతోపాటు పశ్చిమ బెంగాల్లోని కోల్కతాలో అతడికి సంబంధించిన వివిధ ప్రదేశాల్లో సోదాలు నిర్వహించింది. కేసుకు సంబంధించిన కీలకమైన డ్యాక్యుమెంట్లను స్వాధీనం చేసుకున్నది.
మరోవైపు విచారణ నిమిత్తం ప్రధాన నిందితుడిని 10 రోజుల సీబీఐ కస్టడీకి స్థానిక కోర్టు అప్పగించింది. సీబీఐ తెలిపిన వివరాల ప్రకారం.. బిహార్లో నీట్ పేపర్లీకేజీ ప్రధాన సూత్రధారి రాకేశ్ రంజన్ అలియాస్ రాకీ. ఇతడు జార్ఖండ్లోని రాంచీలో ఓ హోటల్ యజమాని. లీకైన నీట్పేపర్ను ఇతడు చింటూ అనే వ్యక్తికి పంపాడు. అనంతరం ఆన్సర్స్తో కూడి పేపర్స్ను చింటూ సర్క్యులేట్ చేశాడు.
పేపర్ను సాల్వ్ చేసేందుకు పాట్నా, రాంచీకి చెందిన పలువురు ఎంబీబీఎస్ విద్యార్థులను రాకీ నియమించుకున్నాడు. ఈ కేసులో మరో నిందితుడైన సంజీవ్ ముఖియాకు రాకీ మేనల్లుడు కావడం గమనార్హం. కాగా, ఈ కేసులో రెండు రోజుల క్రితమే నలందకు చెందిన నీట్-యూజీ అభ్యర్థి సన్నీ, గయాకు చెందిన మరో అభ్యర్థి తండ్రి రంజిత్‌ కుమార్‌ ను సీబీఐ అరెస్ట్ చేసింది. తాజా అరెస్ట్తో ఈ కేసులో అరెస్టైన వారి సంఖ్య 12కు చేరింది.
ఇతర రాష్ట్రాల అభ్యర్థులకు గుజరాతీలో నీట్
నీట్ పేపర్ లీకేజీ జరిగిన గుజరాత్ రాష్ట్రంలోని గోద్రా పట్టణం, ఖేడా జిల్లాలోని పరీక్షా కేంద్రంలో ఇతర రాష్ట్రాల విద్యార్థులు పరీక్ష లాంగ్వేజీని గుజరాతీగా ఎంచుకున్నట్టు తేలింది. ఒడిశా, బిహార్, మహారాష్ట్ర, రాజస్థాన్, ఉత్తర ప్రదేశ్స్టూడెంట్స్కు గుజరాతీ భాష ఎంచుకోవాల్సిందిగా ఇప్పటికే అరెస్టయిన నిందితులు సూచించినట్టు సీబీఐ గుర్తించింది. పరీక్షా ప్రక్రియలో భాగమైన గుజరాతీ వ్యక్తులు ఆ స్టూడెంట్స్ జవాబు పత్రాలను పూరించడానికి వీలుగా ఇలా చేశారని, నిందితులను కస్టడీ కోరుతూ సీబీఐ.. గుజరాత్ కోర్టుకు తెలిపింది.
అలాగే, ఆ స్టూడెంట్స్ పర్మనెంట్ అడ్రస్ను పంచమహల్ లేదా వడోదరగా చూయించాలని నిందితులు సూచించినట్టు సీబీఐ తేల్చింది. పేపర్లీక్ అయిన రెండు పరీక్షా కేంద్రాల నిర్వాహకులు ఒకరేనని దర్యాప్తు సంస్థ పేర్కొంది. వివిధ రాష్ట్రాలకు చెందిన అభ్యర్థులందరినీ నిందితులు వేర్వేరు లింక్‌‌ల ద్వారా సంప్రదించారని తెలిపింది.
సుప్రీంలో విచారణ వాయిదా..
నీట్ యూజీ పరీక్షలో అవకతవకలపై దాఖలైన వివిధ పిటిషన్లపై సుప్రీంకోర్టు గురువారం విచారణ జరిపింది. కేసు విచారణను ఈ నెల 18వ తేదీకి వాయిదా వేసింది. కేంద్రం, ఎన్టీఏ దాఖలు చేసిన అఫిడవిట్లను స్వీకరించినట్టు తెలిపింది. అయితే, ఈ అఫిడవిట్లన్నీ పిటిషనర్లకు చేరలేదని, వాటిని పరిశీలించేందుకు వీలుగా సమయమిస్తూ విచారణను వాయిదా వేస్తున్నట్టు సీజేఐ జస్టిస్ డీవై చంద్రచూడ్ తెలిపారు. కాగా, లీకైన నీట్ పేపర్ బిహార్లోని ఒక్క సెంటర్కే పరిమితమైందని, దేశవ్యాప్తంగా కాదని, సోషల్ మీడియాలో కూడా సర్క్యులేట్ కాలేదని సీబీఐ కోర్టుకు తెలిపినట్టు సమాచారం. ఇందుకు సంబంధించిన సమాచారాన్ని సీల్డ్ కవర్లో గురువారం కోర్టుకు అందజేసింది.
