- ఫోన్చేసి ఉద్యోగం ఇస్తామని ఆఫర్
- ఫ్రెండ్ దగ్గర అప్పు చేసి రూ.28 వేలు కట్టిన విద్యార్థిని
- అప్పు చెల్లించకపోతే హాల్టికెట్ ఆపుతామన్న హెచ్వోడీ ?
- మనస్తాపంతో ఆత్మహత్య
- సూర్యాపేట జిల్లా కొత్తగూడెంలో విషాదం
మేళ్లచెరువు, వెలుగు : సాఫ్ట్వేర్ జాబ్ ఇస్తామని, డబ్బులు కట్టాలని సైబర్ క్రిమినల్స్ ఓ ఇంజినీరింగ్ స్టూడెంట్కు ఫోన్ చేయగా ఆమె తన ఫ్రెండ్ దగ్గర అప్పు తీసుకుని కట్టింది. తర్వాత సైబర్ నేరగాళ్లు ఫోన్ స్విచ్ఛాఫ్ చేసుకోవడంతో మోసపోయానని తెలుసుకుంది. అప్పు సంగతి కాలేజీ వరకు వెళ్లడం, తీసుకున్న వాళ్లకు తిరిగి డబ్బులు కట్టకపోతే ఎగ్జామ్స్కు హాల్టికెట్ఆపేస్తామని హెచ్చరించడంతో ఎటూ పాలుపోక ఆత్మహత్య చేసుకుంది. ఈ ఘటన సూర్యాపేట జిల్లాలో విషాదం నింపింది. పోలీసులు, మృతురాలి కుటుంబసభ్యులు, స్నేహితుల కథనం ప్రకారం..సూర్యాపేట జిల్లా చింతలపాలెం మండలం కొత్తగూడానికి చెందిన కర్లపూడి మౌనిక (22) కోదాడలోని అనురాగ్ కాలేజీలో ఇంజినీరింగ్ ఫైనల్ ఇయర్ చదువుతోంది. నెల కింద సైబర్ క్రిమినల్స్ మౌనిక కు ఫోన్ చేశారు.
తమది సాఫ్ట్వేర్ కంపెనీ అని మంచి జాబ్ ఇస్తామని ఆఫర్ఇచ్చారు. కంపెనీ రూల్స్ ప్రకారం కొంత అడ్వాన్స్ చెల్లించాల్సి ఉంటుందన్నారు. రూ.28 వేలు కడితే జాబ్కన్ఫమ్ చేస్తామని నమ్మబలికారు. దీంతో ఎక్కడ ఉద్యోగం చేజారిపోతుందోనని అనుకున్న మౌనిక ఫ్రెండ్ క్రెడిట్ కార్డు నుంచి డబ్బులు తీసుకుని పంపించింది. వెంటనే సైబర్ క్రిమినల్స్ ఫోన్ స్విచ్ఛాఫ్ చేసుకోవడంతో తాను మోసపోయానని గుర్తించింది. డబ్బులు ఇచ్చిన ఫ్రెండ్స్ నుంచి ఒత్తిడి పెరగడంతో ఇంట్లో చెప్పకుండా ఇంకొందరి స్నేహితుల దగ్గర రూ.17వేలు తీసుకుని కట్టింది. మొదటి ఫ్రెండ్ దగ్గర రూ.11 వేలు, మళ్లీ తీసుకున్న రూ.17 వేలు కట్టే పరిస్థితి లేకుండా పోయింది. విషయం కాలేజీలో హెచ్వోడీకి తెలియడంతో పిలిచి మాట్లాడినట్టు తెలిసింది.
తీసుకున్న డబ్బులు వెంటనే కట్టాలని, లేకపోతే ఎగ్జామ్స్ హాల్టికెట్ ఆపుతామని బెదిరించినట్టు సమాచారం. ఇదంతా ఇంట్లో తెలిస్తే పరువు పోతుందని భయపడిన మౌనిక గురువారం ఇంట్లో ఎవరూ లేని టైంలో పురుగుల మందు తాగింది. కొద్దిసేపటికి వచ్చిన కుటుంబసభ్యులు ఆమెను మేళ్లచెర్వులోని ప్రైవేటు దవాఖానకు, అక్కడి నుంచి కోదాడలోని మరో దవాఖానకు తీసుకెళ్లగా అప్పటికే చనిపోయిందని డాక్టర్లు ప్రకటించారు. మృతురాలి తండ్రి సుబ్బారావు ఫిర్యాదు మేరకు కేసు నమోదు చేసి దర్యాప్తు చేస్తున్నట్టు ఉఎస్ఐ సైదిరెడ్డి తెలిపారు.
