న్యూఢిల్లీ: ప్యాసింజర్ వెహికల్స్ హోల్‌‌సేల్స్ గత ఏడాది మే నెలతో పోలిస్తే ఈసారి మే లో 13.54 శాతం పెరిగి 3,34,247 యూనిట్లకు చేరాయి. యుటిలిటీ వెహికల్స్ అమ్మకాలలో బలమైన వృద్ధి కనిపించింది. సొసైటీ ఆఫ్ ఇండియన్ ఆటోమొబైల్ మాన్యుఫాక్చరర్స్ (సియామ్) తాజా డేటా ప్రకారం... 2022 మేలో తయారీదారుల నుంచి డీలర్‌‌లకు పంపిన కార్ల (పీవీలు) సంఖ్య 2,94,392 యూనిట్లు. సియామ్ డైరెక్టర్ జనరల్ రాజేష్ మీనన్ మాట్లాడుతూ ఈసారి ప్యాసింజర్ వెహికల్స్ అమ్మకాలు మే నెలలో ఎన్నడూ లేనంత అత్యధికంగా నమోదయ్యాయి.
యుటిలిటీ వెహికల్ హోల్‌‌సేల్స్ (టాటా మోటార్స్ మినహా) గత నెలలో 33.5 శాతం వృద్ధి చెంది 1,55,184 యూనిట్లకు చేరుకున్నాయి. గత ఏడాది ఇదేకాలంలో 1,16,255 యూనిట్లు అమ్ముడయ్యాయి. ఈసారి టూవీలర్ హోల్‌‌సేల్స్ 14,71,550 యూనిట్లు కాగా, గత ఏడాది మేలో 12,53,187 యూనిట్లు అమ్ముడుపోయాయి. 2022 మే లో మోటార్‌‌సైకిళ్ల విక్రయాలు 8,19,940 యూనిట్లతో పోలిస్తే గత నెలలో 20.63 శాతం పెరిగి 9,89,120 యూనిట్లకు చేరుకున్నాయని సియామ్ తెలిపింది.
