గోదావరిఖని, వెలుగు: రామగుండం కార్పొరేషన్లో బీఆర్ఎస్కు షాక్ తగిలింది. ఆ పార్టీకి చెందిన మేయర్ అనిల్కుమార్ తోపాటు 14 మంది కార్పొరేటర్లు రామగుండం ఎమ్మెల్యే ఎంఎస్ రాజ్ఠాకూర్ ఆధ్వర్యంలో కాంగ్రెస్ తెలంగాణ ఇన్చార్జి దీపాదాస్ మున్షీ, మంత్రి శ్రీధర్బాబు, ప్రభుత్వ సలహాదారు హర్కర వేణుగోపాల్రావు సమక్షంలో పార్టీ కండువా కప్పుకున్నారు. సోమవారం హైదరాబాద్లో గాంధీభవన్లో జరిగిన ఈ కార్యక్రమంలో మేయర్ అనిల్కుమార్, కార్పొరేటర్లు దాతు శ్రీనివాస్, సాగంటి శంకర్, వేగోళపు రమాదేవి, ఇంజపురి పులేందర్, దుబాసి లలిత, కల్వల శిరీష, పొన్నం విద్య, దొంత శ్రీనివాస్, కొమ్ము వేణు, జెట్టి జ్యోతి, గణ్ముక్కల మహాలక్ష్మి, నీల పద్మ, బాల రాజ్కుమార్, మేకల సదానందం కాంగ్రెస్ పార్టీలో చేరారు.
అలాగే మాజీ కార్పొరేటర్ కుంట సాయి, మాజీ కో ఆప్షన్ మెంబర్ఎండీ గౌస్ కూడా కాంగ్రెస్ గూటికి చేరారు. రామగుండం కార్పొరేషన్లో 49 మంది కార్పొరేటర్లుండగా వీరి చేరికతో కాంగ్రెస్ కార్పొరేటర్ల సంఖ్య 25కు చేరింది. రామగుండం ఎమ్మెల్యే రాజ్ఠాకూర్ మాట్లాడుతూ కాంగ్రెస్ టికెట్పై గెలిచి పార్టీని వెన్నుపోటు పొడిచి బీఆర్ఎస్లో చేరిన వారు తిరిగి రావడానికి ప్రయత్నం చేశారని, కానీ కార్యకర్తల అభిప్రాయం మేరకు వారిని చేర్చుకోలేదన్నారు. కాగా, కాంగ్రెస్లో చేరడానికి వెళ్లిన కార్పొరేటర్లు తాళ్ల అమృతమ్మ, జనగామ కవిత సరోజిని పలు కారణాలతో చేరకుండా వెనుదిరిగి వచ్చారు.
బీఆర్ఎస్కు రాజీనామా...
రామగుండం కార్పొరేషన్ కో ఆప్షన్ మెంబర్ తానిపర్తి విజయలక్ష్మి, మున్సిపల్ మాజీ వైస్చైర్మన్ తానిపర్తి గోపాల్రావు సోమవారం బీఆర్ఎస్కు రాజీనామా చేశారు. రాజీనామా పత్రాన్ని పార్టీ వర్కింగ్ప్రెసిడెంట్ కేటీఆర్కు పంపారు.
