హైదరాబాద్: జీహెచ్ఎంసీ ప్రధాన కార్యాలయంలో బుధవారం (నవంబర్ 6) మేయర్ గద్వాల విజయలక్ష్మి ఆకస్మిక తనిఖీలు చేశారు. సమయానికి విధులకు హాజరుకాని ఉద్యోగులపై ఆమె తీవ్ర ఆగ్రహం వ్యక్తం చేశారు. టౌన్ ప్లానింగ్ ఉద్యోగుల తీరుపై మేయర్ విజయలక్ష్మి మండిపడ్డారు. ప్రజావాణిలో టౌన్ ప్లానింగ్కు సంబంధించి ఫిర్యాదులు ఎక్కువ వస్తున్నాయని.. ఇకనైనా తీరు మార్చుకోవాలని హెచ్చరించారు. విధులకు గైర్హాజరైన అధికారులు, ఉద్యోగుల పేర్లను నమోదు చేయాలని సంబంధిత అధికారులకు మేయర్ సూచించారు. ప్రభుత్వం ప్రతిష్టాత్మకంగా చేపడుతోన్న తెలంగాణ ఇంటింటి కుటుంబ సమగ్ర సర్వేపైన అధికారులను ఆరా తీశారు.
