మెదక్ టౌన్, వెలుగు: గ్రామాల అభివృద్ధిలో పంచాయతీ సెక్రటరీల పనితీరు కీలకం కావాలని మెదక్ కలెక్టర్ రాహుల్ రాజ్ అన్నారు. బుధవారం కలెక్టరేట్ లో డివిజనల్, మండల స్థాయి పంచాయతీ అధికారులు, గ్రామ పంచాయతీ సెక్రటరీలు, కంప్యూటర్ ఆపరేటర్లతో సమీక్ష నిర్వహించారు. ఈ సందర్భంగా కలెక్టర్ మాట్లాడుతూ గ్రామాల్లో ప్రతిరోజు నిర్వహించే శానిటేషన్, హౌస్ ట్యాక్స్ కలెక్షన్, గ్రామపంచాయతీ ఇన్స్పెకక్షన్లు, ట్రేడ్ లైసెన్స్, సెల్ టవర్ లైసెన్స్, ఇంటి పర్మిషన్లు, మల్టీపర్పస్ వర్కర్స్ వేతనాలు సంబంధిత అంశాలపై సుధీర్ఘంగా చర్చించారు.
పంచాయతీ సెక్రటరీలు సంక్షేమ పథకాలు అమలులో వారి పనితీరు హర్షణీయమని, ఇదే స్ఫూర్తితో ముందుకు కొనసాగాలని ఆకాంక్షించారు. సంక్షేమ పథకాల ఆన్లైన్ డేటా ఎంట్రీలో వంద శాతం పురోగతి సాధించాలని సూచించారు. గ్రామాలు స్వచ్ఛతకు నిలయాలుగా మారాలని పంచాయతీ సెక్రటరీల పనితీరుతోనే అది సాధ్యపడుతుందని కలెక్టర్ వివరించారు. అడిషనల్ కలెక్టర్ నగేశ్, డీపీవో యాదయ్య, డీఎల్పీవోలు, ఎంపీవోలు, పంచాయతీ సెక్రటరీలు, కంప్యూటర్ ఆపరేటర్లు పాల్గొన్నారు.
నేషనల్కి సెలక్ట్ కావడం అభినందనీయం
క్రీడల్లో ప్రతిభ కనబరిచి జాతీయస్థాయికి ఎంపిక కావడం అభినందనీయమని కలెక్టర్ రాహుల్ రాజ్ వివిధ శాఖల ఉద్యోగులను కొనియాడారు. ఈ నెల 24, 25 తేదీల్లో హైదరాబాద్లో నిర్వహించిన రాష్ట్రస్థాయిపోటీల్లో జిల్లా నుంచి 20 మంది క్రీడాకారులు పాల్గొన్నారు.
బుధవారం కలెక్టరేట్ లో క్రీడల్లో ఉత్తమ ప్రతిభ కనబరిచి జాతీయ స్థాయికి ఎంపికైన విద్య, వ్యవసాయం, పంచాయతీ విభాగాల ఉద్యోగులను ఆయన సన్మానించారు. జాతీయ స్థాయి క్రీడలకు క్యారమ్స్లో సతీశ్, తూప్రాన్మండల పంచాయతీ అధికారి, రన్నింగ్లో రాజశేఖర్ గౌడ్ (ఏఈవో), హాకీలో శ్వేతా కుమారి, శారదలు ఎంపికయ్యారు.
