- దుకాణానికి రూ.4 లక్షల చొప్పున వసూలు
- రసీదులు ఇవ్వని అధికారులు
- లబోదిబోమంటున్న వ్యాపారులు
పాపన్నపేట, వెలుగు : మెదక్ జిల్లాలోని ఏడుపాయల ఆలయానికి సంబంధించిన రూ.3 కోట్ల విలువైన బంగారం, వెండి ఈవో ఇంటికి తీసుకెళ్లడం వివాదాస్పదం కాగా, తాజాగా రూ.3 కోట్లతో నిర్మించిన షాపుల కేటాయింపులోనూ అవకతవకలకు పాల్పడ్డట్టు తెలుస్తోంది. షాపింగ్ కాంప్లెక్స్లో తొమ్మిది దుకాణాలను నిర్మించగా 30, 40 ఏండ్ల నుంచి అదే జాగాలో టెంపరరీ దుకాణాలు ఏర్పాటు చేసుకుని వ్యాపారం చేసుకుంటున్న వారికే అద్దెకు ఇచ్చారు. అయితే, దుకాణాలు అలాట్చేసేటపుడు ఒక్కొక్కరి దగ్గర డిపాజిట్ పేరుతో రూ.4 లక్షలు వసూలు చేసినట్టు సమాచారం.
9 దుకాణాలకు 8 మంది వద్ద రూ.4 లక్షల చొప్పున రూ.32 లక్షలు ఆలయ అధికారులు తీసుకున్నారని తెలుస్తోంది. అడ్వాన్స్పేరుతో ఈ డబ్బంతా తీసుకున్నా ఎలాంటి రసీదులు ఇవ్వడం గాని, అగ్రిమెంట్పేపర్లు రాసుకోవడం కానీ చెయ్యలేదు. మూడు రోజుల కింద ఏడుపాయల ఆలయ ఈవో బంగారం తీసుకెళ్లిన వ్యవహారం బయటకు రావడంతో సదరు వ్యాపారులు తాము ఇచ్చిన రూ. 4 లక్షలు ఏమవుతాయోనని ఆందోళన చెందుతున్నారు. జాతర టైంలో డబ్బులు లేకపోతే భార్య మెడలో బంగారాన్ని తాకట్టు పెట్టి డబ్బులు డిపాజిట్ చేశామని చెప్పారు. ఉన్నతాధికారులు స్పందించి తమ డిపాజిట్లకు రసీదులు ఇవ్వాలని కోరుతున్నారు.
