- 26న ప్రధాని ద్వారా వర్చువల్ గా శంకుస్థాపన
మెదక్, వెలుగు: అమృత్ భారత్ పథకానికి మెదక్ రైల్వే స్టేషన్ ఎంపికైంది. ఈ నెల 26న ప్రధాన మంత్రి నరేంద్ర మోదీ వర్చువల్ గా శంకుస్థాపన చేయనున్నారు. ఆ రోజు 2 వేల మందితో రైల్వే స్టేషన్ వద్ద సభ ఏర్పాటుకు రైల్వే అధికారులు ఏర్పాటు చేస్తున్నారు. తెలంగాణలో రైల్వే మౌలిక సదుపాయాలను మెరుగుపరచడానికి ఇండియన్ రైల్వే డిపార్ట్మెంట్చర్యలు చేపట్టింది.
ఇందులో భాగంగా రాష్ట్రంలో 40 రైల్వే స్టేషన్లను ప్రపంచ స్థాయి రైల్వే స్టేషన్ లుగా అభివృద్ధి చేసేందుకు ప్రణాళికలు రూపొందించింది. ఇందులో మెదక్ రైల్వే స్టేషన్ కు చోటు దక్కింది. అమృత్ పథకం కింద స్టేషన్ను ఆధునికీకరిస్తారు. ప్రయాణికులకు సౌకర్యాలు మెరుగు పరుస్తారు. రూ.206 కోట్ల వ్యయంతో మెదక్ -అక్కన్నపేట మధ్య 17.2 కిలోమీటర్ల దూరం కొత్త రైల్వేలైన్ నిర్మించగా.. 2022 సెప్టెంబర్ 23వ తేదీన మెదక్ రైల్వే స్టేషన్ ప్రారంభమైంది.
ప్రస్తుతం కాచిగూడ - మెదక్ మధ్య రోజు రెండు ప్యాసింజర్ రైళ్లు నడుస్తున్నాయి. రైల్వేర్యాక్ పాయింట్ కూడా ఏర్పాటు కావడంతో ఎరువులకు ఇబ్బంది లేకుండా గూడ్స్ ద్వారా ఎరువుల బస్తాలు వస్తున్నాయి. రిజర్వేషన్ సెంటర్ కూడా సక్సెస్ ఫుల్ గా నడుస్తుంది.
