భార్యను కుక్కర్లో ఉడికించిన గురుమూర్తికి చివరకు ఏ గతి పట్టిందో చూడండి..

హైదరాబాద్: తెలుగు రాష్ట్రాల్లో సంచలనం సృష్టించిన మీర్పేట్ మర్డర్ కేసులో కీలక పరిణామం చోటు చేసుకుంది. భార్యను అత్యంత కిరాతకంగా హత్య చేసిన నిందితుడు గురుమూర్తిని మీర్పేట్ పోలీసులు రిమాండ్కు తరలించారు. వనస్థలిపురంలోని ప్రభుత్వ ఏరియా ఆస్పత్రిలో వైద్య పరీక్షలు పూర్తి చేసి ఎల్బీనగర్లోని రంగారెడ్డి జిల్లా కోర్టులో పోలీసులు హాజరుపర్చారు. గురుమూర్తికి కోర్టు 14 రోజుల రిమాండ్ విధించింది. కోర్టు రిమాండ్ విధించిన అనంతరం నిందితుడు గురుమూర్తిని పోలీసులు చర్లపల్లి జైలుకు తరలించారు.

రంగారెడ్డి జిల్లా రాచకొండ కమిషనరేట్ మీర్ పేట్ పరిధిలో దారుణం జరిగిన సంగతి తెలిసిందే. గురుమూర్తి అనే వ్యక్తి తన భార్యను చంపి ముక్కలు ముక్కలుగా నరికి కుక్కర్లో వేసి ఉడికించాడు. తర్వాత వాటిని తీసుకువెళ్లి సమీపంలోని డ్రైనేజీలో పడేశాడు. బొక్కలను కాల్చి పొడి చేసి చెరువులో కలిపాడు. జనవరి16న ఘటన జరగ్గా ఈ ఘటన ఆలస్యంగా వెలుగులోకి వచ్చింది. ప్రకాశం జిల్లాకు చెందిన ఉప్పల సుబ్బమ్మ, వెంకటరమణ భార్యాభర్తలు. వీరికి ముగ్గురు బిడ్డలు. పెద్ద కుమార్తె వెంకటమాధవి(35)ని13 ఏండ్ల కింద అదే జిల్లాకు చెందిన గురుమూర్తికి ఇచ్చి పెండ్లి జరిపించారు. వీరికి ఇద్దరు పిల్లలు. గురుమూర్తి ఆర్మీలో జవాన్గా పని చేసి వాలంటరీ రిటైర్మెంట్​తీసుకున్నాడు. తర్వాత కంచన్​బాగ్ ​డీఆర్డీవోలో సెక్యూరిటీ గార్డుగా పని చేస్తూ మీర్ పేట్ పీఎస్​పరిధి జిల్లెలగూడలోని న్యూ వెంకటేశ్వర కాలనీలో ఉంటున్నాడు.

ALSO READ | భార్యను క్రూరంగా చంపాడు.. ఇలాంటి కేసు ఎప్పుడు చూడలే: సీపీ సుధీర్ బాబు

కొన్నాళ్ల నుంచి గురుమూర్తి తన భార్య వెంకటమాధవిపై అనుమానం పెంచుకున్నాడు. ఈ విషయంలో భార్యాభర్తలకు తరచూ గొడవలు జరుగుతూ ఉండేవి. ఈ క్రమంలో ఈ నెల16వ తేదీన భార్యతో గొడవపడిన గురుమూర్తి.. తర్వాత తన భార్య కనిపించడం లేదని అత్తమామలకు సమాచారం ఇచ్చాడు. తనతో గొడవ పడి భార్య ఇంటి నుంచి వెళ్లిపోయిందని ఒక్కడే వెళ్లి మీర్ పేట్ పోలీసులకు ఫిర్యాదు చేశాడు. కేసు నమోదు చేసుకున్న పోలీసులు దర్యాప్తు చేపట్టారు. దర్యాప్తులో భాగంగా పోలీసులు ఇంటి ఎదురుగా, పక్కన ఉన్న సీసీ కెమెరాలను పరిశీలించారు.

అందులో 16వ తేదీన గాని, ఆ తర్వాత గాని.. వెంకటమాధవి ఎక్కడా బయటకు వెళ్లినట్టుగాని, లోపలకు వచ్చినట్టు గాని కనిపించలేదు. పలుమార్లు గురుమూర్తి కొన్ని కవర్లతో బయటకు వెళ్లి రావడాన్ని గుర్తించారు. దీంతో అతడిని అదుపులోకి తీసుకుని విచారించారు. తర్వాత వెంకటమాధవి అత్తతో ఫిర్యాదు తీసుకుని సీసీటీవీ ఫుటేజీల గురించి గురుమూర్తికి చెప్పి ప్రశ్నించారు. ఇక కేసు నుంచి బయటపడలేనని అర్థమైన గురుమూర్తి..తానే హత్య చేసినట్లు ఒప్పుకున్నాడు.