కోదాడ/హుజూర్ నగర్, వెలుగు : సూర్యాపేట జిల్లా మేళ్లచెరువు మండలం కరెంట్ ఏఈ గోవిందరాజు కాంట్రాక్టర్ నుంచి లంచం తీసుకుంటూ ఏసీబీ ఆఫీసర్లకు పట్టుబడ్డాడు. మేళ్లచెరువు మండలం కందిబండ గ్రామానికి చెందిన తిరుపతమ్మ విద్యుత్ శాఖలో క్లాస్ వన్ కాంట్రాక్టర్. పనులను ఆమె సోదరుడు రాజేశ్పర్యవేక్షిస్తుంటాడు. గత సంవత్సరం రూ. 19 లక్షల కాంట్రాక్ట్ పనులు చేశారు. పనులకు సంబంధించిన బిల్లులు సమర్పించే సమయానికి ఏఈగా గోవిందరాజు ట్రాన్స్ఫర్పై వచ్చాడు. మొదట్లో బిల్లులు మంజూరు చేయకుండా కాలయాపన చేశాడు. మూడు నెలల క్రితం బిల్లులు మంజారు చేయాలంటే తనకు 5 శాతం కమీషన్ ఇవ్వాలని డిమాండ్ చేయగా 3 శాతం రూ. 54 వేలు ఇచ్చేందుకు ఒప్పందం కుదిరింది.
54 వేలలో రూ. 25 వేలు ఇవ్వడం తో రూ. 14 లక్షలు మంజూరయ్యాయి. అదే సమయంలో కొత్తగా చేసిన పనులకు సంబంధించిన బిల్లులు చేయకుండా నిలిపివేశారు. ఆ బిల్లులు కూడా మంజూరు చేయాలంటే మిగిలిన డబ్బులు ఇవ్వాలని డిమాండ్ చేశాడు. దీంతో రాజేశ్ఏసీబీ ఆఫీసర్లకు ఫిర్యాదు చేశాడు. వారి సూచనల మేరకు మంగళవారం డబ్బులు ఇచ్చేందుకు కోదాడ వెళ్లాడు. హుజూర్ నగర్ రోడ్ లోని రిలయన్స్ మార్ట్ ఎదురుగా కారులో ఏఈ ఉండగా రాజేశ్ ఆయనకు డబ్బులు ఇవ్వబోయాడు. కారు డ్యాష్ బోర్డులో పెట్టాలని చెప్పడంతో రాజేశ్ అలానే చేశాడు. రాజేశ్ వెళ్లిన తరువాత ఏసీబీ అధికారులు దాడి చేసి కారులో ఉన్న డబ్బును స్వాధీనం చేసుకున్నారు. కారు సీజ్ చేశారు . ఏఈను అదుపులోకి తీసుకుని హుజూర్ నగర్ లోని విద్యుత్ డీఈ ఆఫీసుకు తరలించి అక్కడ సోదాలు నిర్వహించారు. కేసు దర్యాప్తు చేస్తున్నట్లు ఏసీబీ నల్గొండ డీఎస్పీ కృష్ణ గౌడ్ చెప్పారు.
