జనగామ, వెలుగు: ‘అసలేం పనులైత లేవ్.. ఎన్నిసార్లు చెప్పినా పట్టింపు లేదు.. ఎక్కడి పనులు అక్కడనే ఉన్నయ్.. ఇంకో 18 నెలలైతే పదవీకాలం అయిపోతది.. గిట్లైతే ఎట్లా? డబుల్ బెడ్రూం ఇండ్లు పూర్తి చేయకుంటే ధర్నాలు చేసుడే’ అని జనగామ జడ్పీ మీటింగ్ లో అధికార పార్టీ సభ్యులు ఆవేదన వ్యక్తం చేశారు. గురువారం జిల్లా కేంద్రంలోని జడ్పీ ఆఫీస్ మీటింగ్ హాల్లో చైర్మన్ పాగాల సంపత్ రెడ్డి అధ్యక్షతన జడ్పీ జనరల్ బాడీ మీటింగ్ నిర్వహించారు. ఈ సమావేశానికి కలెక్టర్ శివలింగయ్య, అడిషనల్ కలెక్టర్అబ్దుల్ హమీద్ హాజరయ్యారు.
ప్రోటోకాల్ పాటించట్లే..
మీటింగ్లో మరోసారి ప్రోటోకాల్ రగడ జరిగింది. జఫర్గడ్ జడ్పీటీసీ ఇల్లందుల బేబీ, బచ్చన్నపేట, తరిగొప్పుల ఎంపీపీలు నాగజ్యోతి, జొన్నగోని హరిత మాట్లాడుతూ.. ఆఫీసర్లు కనీస సమాచారం ఇవ్వడం లేదని, ప్రోగ్రాంలకు పిలుస్తలేరని చెప్పారు. ఎన్నిసార్లు చెప్పినా పద్ధతి మార్చుకోవడం లేదన్నారు. స్పందించిన కలెక్టర్ శివలింగయ్య..ప్రోటాకాల్ పాటించేలా సర్క్యులర్ జారీ చేయాలని జడ్పీ సీఈవో వసంతను ఆదేశించారు.
ఆడపిల్లల రక్షణ బాధ్యత ఎవరిది..?
చిల్పూరు మండలంలో కస్తూర్బా గాంధీ స్కూల్ బిల్డింగ్పనులు పూర్తి కాకముందే స్టూడెంట్లను సదరు బిల్డింగ్లోకి మార్చారని జడ్పీ చైర్మన్ సంపత్ రెడ్డి మండిపడ్డారు. ‘ప్రహరీ గోడ లేదు.. చుట్టూ అడవి ఉంటది.. తండాలున్నయ్.. కనీస రక్షణ లేదు.. ఆడపిల్లలు ఉండే ఈ స్కూల్లో పిల్లలకు ఏదైనా జరిగితే ఎవరు బాధ్యులు?’ అని డీఈవో రామును నిలదీశారు. తాను చెప్పినా ఎందుకు పట్టించుకోవడం లేదని గరం అయ్యారు.
డబుల్ బెడ్రూంలు పూర్తి చేయకుంటే ధర్నాలు
డబుల్ బెడ్రూం ఇండ్ల పనులు పూర్తి చేయకుంటే ధర్నాలు, రాస్తారోకోలు చేస్తామని జనగామ ఎంపీపీ మేకల కలింగ రాజు ఆఫీసర్లను హెచ్చరించారు. తన సొంత గ్రామం శామీర్ పేటలో డబుల్ బెడ్రూం ఇండ్ల నిర్మాణం మధ్యలో ఆపేశారని, ఎన్నిసార్లు అడిగినా పట్టించుకోవడం లేదన్నారు. పంచాయతీరాజ్ ఈఈ చంద్రశేఖర్ పనులు పూర్తయ్యేలా చర్యలు చేపడుతామన్నారు. తరిగొప్పుల జెడ్పీటీసీ ముద్దసాని పద్మజ మాట్లాడుతూ.. తమ మండలంలో పీహెచ్సీని ఏర్పాటు చేయాలని, రెగ్యులర్ ఎంపీడీవోను నియమించాలని కోరారు. తరిగొప్పుల– సోలిపురం, సోలిపురం–అంకుశాపురం, అంకుశాపురం–కూటిగల్ రోడ్లు అధ్వానంగా ఉన్నాయని, వెంటనే రిపేర్లు చేపట్టాలని కోరారు.
వచ్చే నెల 15 వరకు క్లోజ్ చెయ్యాలె..
పల్లెల్లో చేపడుతున్న శ్మశాన వాటిక పనులు మూడేండ్ల నుంచి మూలుగుతున్నాయని జడ్పీ చైర్మన్ పాగాల సంపత్ రెడ్డి అసహనం వ్యక్తం చేశారు. వచ్చే నెల 15లోపు పనులు పూర్తి చేయాలని ఆఫీసర్లను ఆదేశించారు. కరెంట్ కనెక్షన్ల వల్లే లేట్ అవుతున్నాయని పంచాయతీ రాజ్ ఈఈ తెలపగా.. ట్రాన్స్ కో ఎస్ఈ మాట్లాడుతూ... బిల్లులు కట్టిన వివరాల లిస్ట్ ఇస్తే పనులు చేయిస్తామన్నారు. సమన్వయం లోపంతో పనులు లేట్ చేయడం సరికాదని జడ్పీ చైర్మన్ మరోసారి హెచ్చరించారు.
జిల్లా అభివృద్ధికి కృషి
జిల్లా అభివృద్ధికి చర్యలు తీసుకుంటున్నట్లు కలెక్టర్ సీహెచ్ శివలింగయ్య తెలిపారు. జడ్పీ మీటింగ్లో ఎన్సీడీ(నాన్ కమ్యూనల్ డిసీజ్) కిట్ బ్యాగ్ ను ఆవిష్కరించారు. పల్లెల్లో బీపీ షుగర్ వ్యాధులతో బాధపడుతున్న వారి కోసం సర్కారు ఉచితంగా మందులను పంపిణీ చేస్తోందన్నారు. పీహెచ్సీలు, సబ్ సెంటర్లలో ఇవి అందుబాటులో ఉంటాయని, బాధితులు సద్వినియోగం చేసుకోవాలని కోరారు. ఈ ప్రోగ్రాంకు ప్రజాప్రతినిధులు సహకారం అందించాలన్నారు. జిల్లాలో మన ఊరు– మన బడి పనులు వేగంగా సాగుతున్నాయన్నారు.
