- నిరుపయోగ చేతి పంపులపై మెట్రో వాటర్బోర్డు దృష్టి
- గ్రేటర్లో పాడై పోయిన 3,222 బోర్లను గుర్తించిన సంస్థ
- ఇంజెక్షన్ బోర్వెల్స్గా మార్చి భూగర్భ జలాలు పెంచే ప్లాన్
- బల్దియా సహకారంతో పనులు
హైదరాబాద్సిటీ, వెలుగు:గ్రేటర్లో అడుగంటుతున్న భూగర్భ జలాలను పెంచేందుకు మెట్రో వాటర్బోర్డు అధికారులు 90 రోజుల ప్రణాళిక పేరుతో జంట నగరాల్లో స్పెషల్డ్రైవ్నిర్వహిస్తున్నారు. తాజాగా వివిధ ప్రాంతాల్లో పనికి రాకుండా ఉన్న హ్యాండ్బోర్ వెల్స్(చేతి పంపులు) ను ఇంజక్షన్(బోర్) వెల్పద్ధతిలో ఇంకుడు గుంతలుగా మార్చాలని ప్రణాళికలు రూపొందించారు.
గత వేసవిలో గ్రేటర్పరిధిలోని పలు ప్రాంతాల్లో భూగర్భ జలాలు పడిపోవడంతో తాగునీటితోపాటు గృహావసరాలకు కూడా అదనంగా ట్యాంకర్ల ద్వారా నీటిని సరఫరా చేయాల్సిన పరిస్థితి తలెత్తింది. భవిష్యత్లో అలా కాకూడదన్న ఉద్దేశంతో ఉన్నతాధికారులు పక్కా ప్లాన్తో ముందుకు పోతున్నారు.
10 నుంచి 20 మీటర్ల లోతులో...
ప్రస్తుతం గ్రేటర్పరిధిలో భూగర్భ జలాలు ఆశించిన స్థాయిలో లేవని అధికారులు అంటున్నారు. ముఖ్యంగా కోర్సిటీలో అంటే ఓల్డ్సిటీ, నాంపల్లి, అబిడ్స్, సికింద్రా బాద్ తదితర ప్రాంతాల్లో 10 మీటర్ల లోతులో భూగర్భ జలాలుండగా..హైటెక్సిటీ, శేరిలింగంపల్లి, కూకట్ పల్లి, కుత్బుల్లాపూర్ తదితర ప్రాంతాల్లో 20 మీటర్ల లోపల నీటి నిల్వలున్నట్టు మెట్రో వాటర్బోర్డు రెయిన్వాటర్హార్వెస్టింగ్విభాగం ఆఫీసర్ జాలా సత్యనారాయణ తెలిపారు.
అందుకే భూగర్భ జలాల పెంపుపై దృష్టి పెట్టారు. ఇందులో భాగంగా గ్రేటర్పరిధిలో 3,222 బోర్ వెల్స్ నిరుపయోగంగా ఉన్నాయని గుర్తించారు. ఇందులో కోర్సిటీలో 1665, శివార్లలో 1557 బోర్లున్నట్లు తేల్చారు. బల్దియా సహకారంతో ఈ బోర్వెల్స్ను ఇంజక్షన్(బోర్)వెల్స్గా మార్చనున్నారు.
ఇంజక్షన్ (బోర్)వెల్స్అంటే..
నిరుపయోగంగా ఉన్న బోర్వెల్ ను అడుగు మేర ఎత్తి సైజును బట్టి చుట్టూ చతురస్రాకారంలో గోడ కడతారు. బోర్వెల్ను రెండు మీటర్లు పైకి లేపి కేసింగ్పైపు చుట్టూ రంధ్రాలు చేస్తారు. తర్వాత స్టీల్మెష్చుడతారు. దాని చుట్టూ 50 శాతం మేరకు దొడ్డు కంకర (40ఎంఎం) పోస్తారు. మరో 25 శాతం చిన్న కంకర( 20ఎంఎం) నింపుతారు.
తర్వాత 9 అంగుళాల నుంచి ఒక అడుగు మేర దొడ్డు ఇసుక ఒక పొర పోసిన తర్వాత దానిపై జియో టెక్స్ టైల్మ్యాట్ను పరిచి మళ్లీ దానిపై ఇసుక పోస్తారు. వర్షపు నీరు నేరుగా ఇందులోకి వెళ్లేలా చూస్తారు. వర్షపు నీరు ఇసుక మీదుగా పారుతూ ఫిల్టర్అవుతూ కిందకు కేసింగ్పైపు నుంచి లోపలకు వెళ్తుంది. లోపలున్న రంధ్రాల ద్వారా భూమి చుట్టూ విస్తరించి భూగర్భ జలాలు పెరగడానికి కారణమవుతుంది.
వాన నీటిని సంరక్షించుకోవాలి
వర్షపు నీటిని సంరక్షించి భూగర్భ జలాలు పెంచుకోవాలని నిరుపయోగంగా ఉన్న బోర్వెల్స్ను ఇంకుడు గుంతలుగా మారుస్తున్నాం. దీని కోసం పనికి రాని 3,222 బోర్లను గుర్తించాం. వీటిని ఇంజక్షన్ బోరువెల్స్గా మార్చి అనుకున్న లక్ష్యాన్ని సాధిస్తాం. దీనివల్ల నీటి సమస్య కొంతవరకు తగ్గుతుంది. నగరవాసులందరూ సహ‌‌కరించాలి.
- ఎండీ అశోక్‌ రెడ్డి
