న్యూఢిల్లీ: యావత్ దేశాన్ని దిగ్భ్రాంతికి గురి చేసిన పహల్గాం ఉగ్రదాడి కేసు విషయంలో కేంద్ర హోంశాఖ కీలక నిర్ణయం తీసుకుంది. పహల్గాం టెర్రర్ ఎటాక్ కేసును నేషనల్ ఇన్విస్టిగేషన్ ఏజెన్సీ (NIA)కి అప్పగించింది. ఈ మేరకు కేంద్ర హోంశాఖ శనివారం (ఏప్రిల్ 26) ఉత్తర్వులు జారీ చేసింది. ఈ కేసు దర్యాప్తును ఎన్ఐఏ పర్యవేక్షిస్తోందని పేర్కొంది.
సెంట్రల్ హోం మినిస్ట్రీ ఆదేశాలతో ఎన్ఐఏ రంగంలోకి దిగింది. పహల్గామ్ దాడికి సంబంధించిన కేసు డైరీ, ఎఫ్ఐఆర్ను స్థానిక పోలీసుల నుంచి తీసుకుంది. ఇప్పటికే జమ్మూ కాశ్మీర్‌లోని పహల్గామ్‌కు వెళ్లిన ఎన్ఐఏ టీమ్.. ఘటన స్థలాన్ని పరిశీలించి స్థానిక పోలీసుల నుంచి వివరాలు అడిగి తెలుసుకుంది. ఎన్ఐఏ ఫోరెన్సిక్ బృందం ఘటన స్థలంలో సాక్ష్యధారాలను సేకరించింది.
కాగా, జమ్మూ కాశ్మీర్‌లోని పహల్గాం బెసరన్ మైదాన ప్రాంతంలో ఏప్రిల్ 22న ఉగ్రవాదులు మారణహోమం సృష్టించిన విషయం తెలిసిందే. పర్యాటకులపై విచక్షణరహితంగా కాల్పులు జరిపారు. ఈ కాల్పుల్లో 26 మంది టూరిస్టులు హతమయ్యారు. పహల్గాం టెర్రర్ ఎటాక్ ను కేంద్ర ప్రభుత్వం సీరియస్గా తీసుకుంది.
పహల్గాం దాడికి పాల్పడిన ఉగ్రమూకల వెనక పాక్ ప్రమేయం ఉన్నట్లు గుర్తించిన భారత్.. దాయాది దేశంపై తీవ్ర ఆగ్రహంగా ఉంది. ఉగ్రవాదాన్ని పెంచి పోషిస్తోన్న పాక్కు తగిన బుద్ధి చెప్పాలని.. సింధు నది జలాల ఒప్పందం రద్దు వంటి కఠిన ఆంక్షలు విధించడంతో పాటు.. ఆ దేశంతో దౌత్య, వాణిజ్య సంబంధాలు పూర్తిగా తెంచేసుకుంది.
