- తప్పతాగి జనాలపైకి దూసుకెళ్లిన వ్యక్తి
- 12 మందికి గాయాలు, 8 బైకులతోపాటు కారు ధ్వంసం
- నిందితుడిని పట్టుకొని చితకబాదిన స్థానికులు
మెహిదీపట్నం, వెలుగు : నాంపల్లి నీలోఫర్ కేఫ్ వద్ద అర్ధరాత్రి ఓ కారు బీభత్సం సృష్టించింది. తప్పతాగిన వ్యక్తి కారుతో జనాలపైకి దూసుకెళ్లాడు. ఈ ఘటనలో 12 మందికి గాయాలు కాగా, మరో కారుతో పాటు 8 బైక్లు ధ్వంసమయ్యాయి. రాజేంద్రనగర్ ప్రాంతానికి చెందిన అహ్మద్ మాలిక్ (32) ప్రైవేటు జాబ్చేస్తున్నారు. పీకలదాకా మద్యం సేవించి, బుధవారం రాత్రి ఒంటిగంట ప్రాంతంలో ఒక్కడే బిర్యానీ కోసం లక్డీకాపూల్ నుంచి బజార్ ఘాట్లోని అహమదుల్లా హోటల్కు బయలుదేరాడు.
మార్గమధ్యలో నీలోఫర్ కేఫ్ వద్ద చాయ్ తాగుతున్న జనాలపైకి దూసుకెళ్లాడు. దీంతో12 మందికి గాయాలు కాగా, ఇందులో మొయినుద్దీన్ అనే వ్యక్తికి తీవ్రంగా గాయపడ్డాడు. ఈ ఘటనలో మరో కారుతో పాటు 8 బైక్లు ధ్వంసం అయ్యాయి. వెంటనే అక్కడున్న స్థానికులు నిందితుడిని పట్టుకొని చితకబాదారు. ఫుల్లుగా మద్యం తాగి ఉండడంతో పోలీసులకు అప్పగించారు. గాయపడిన వారిని దగ్గర్లోని ఆసుపత్రికి తరలించారు. బాధితుల ఫిర్యాదుతో నాంపల్లి పోలీసులు కేసు నమోదు చేసి దర్యాప్తు చేస్తున్నారు.
