జనగామ జిల్లాలో సీఎంఆర్​ బకాయిలపై మొండికేస్తున్న మిల్లర్లు

• జనగామ జిల్లాలో రూ.6 కోట్లకు పైగా బకాయిలు ఉన్న ఇద్దరు మిల్లర్లు
• క్రిమినల్ కేసులు పెట్టినా స్పందన కరువు​
• వసూళ్ల కోసం యంత్రాంగం తిప్పలు
• రెండు మూడు రోజుల్లో చర్యలకు రంగం సిద్ధం

జనగామ, వెలుగు: సీఎంఆర్​(కస్టమ్​మిల్లింగ్​ రైస్) బకాయిల చెల్లింపు పై మిలర్లు మొండికేస్తున్నారు. క్రిమినల్​కేసులు పెట్టినా స్పందించకపోవడం సివిల్​సప్లై అధికారులకు ఇబ్బందిగా మారింది. బకాయిపడిన బియ్యాన్ని రాబట్టేందుకు అధికార యంత్రాంగం మరింత కఠిన చర్యలు చేపట్టేందుకు రంగం సిద్ధం చేస్తోంది. 

ఆదేశాలు బేఖాతర్..
​
జనగామ జిల్లాలోని 20 బాయిల్డ్​ రైస్​ మిల్లులు, 39 రా రైస్​ మిల్లులకు అధికారులు సర్కారు సెంటర్లలో కొనుగోలు చేసిన వడ్లను పంపించారు. సకాలంలో సీఎంఆర్​ రైస్​ను అందించాల్సి ఉండగా, కొందరు నిర్లక్ష్యం చేస్తున్నారు. దేవరుప్పుల మండలం మన్​పహాడ్​లోని సాయిరాం మోడ్రన్​ బిన్నీ రైస్​ మిల్​యాజమాన్యం ఏకంగా రూ.5,67,46,429 విలువ చేసే సీఎంఆర్​ను ప్రభుత్వానికి ఇవ్వకుండా మొండికేసింది. ఈ మిల్లుకు 2022–-23 యాసంగి సీజన్, 2023-–24 వానాకాలంలో 1987.560 మెట్రిక్​టన్నుల ధాన్యం కేటాయించగా, కేవలం 143.038 మెట్రిక్​టన్నుల సీఎంఆర్​మాత్రమే అందించింది.

మిగిలిన 1774.071 మెట్రిక్​టన్నుల రైస్​ ను అందించకుండా వడ్లను పక్కదారి పట్టించారు. దీంతో అధికారులు అక్టోబర్​ లో మిల్లుపై దాడులు నిర్వహించి, క్రిమినల్​ కేసులు నమోదు చేశారు. సదరు మిల్లర్ కు సంబంధించిన ఆస్తులకు సంబంధించి ఎలాంటి రిజిస్ట్రేషన్లను చేయొద్దని రిజిస్ట్రార్​కు లేఖ రాశారు. అయినా ఇప్పటి వరకు సదరు మిల్లర్​పేమెంట్​చేయడం లేదు. రఘనాథపల్లి మండలం కంచనపల్లిలోని రాజరాజేశ్వర రైస్​మిల్లు కూడా సుమారు రూ.కోటి విలువ చేసే సీంఎంఆర్​ ధాన్యాన్ని ఇవ్వాల్సి ఉండడంతో నోటీసులు అందించినట్లు అధికారులు తెలిపారు. ఈ మిల్లర్​ కూడా తీవ్ర జాప్యం చేస్తున్నాడని, కేసులు నమోదు చేసేందుకు ఏర్పాట్లు చేస్తున్నట్లు పేర్కొన్నారు.

కొనసాగుతున్న సేకరణ..

జిల్లాలో గత యాసంగి, వానాకాలం సీజన్​లకు సంబంధించిన సీఎంఆర్​ సేకరణ త్వరగా చేపడుతున్నారు. జిల్లాలోని రెండు మిల్లుల యజమానులు మొండికేసినా మిగిలిన మిల్లర్లు సజావుగానే సీఎంఆర్ అందిస్తున్నట్లు సివిల్​ సప్లై అధికారులు చెబుతున్నారు. 2023-–24 వానాకాలం లో 80,864.240 మెట్రిక్​ టన్నుల ధాన్యాన్ని మిల్లర్లుకు పంపారు. మొత్తం 54,273.366 మెట్రిక్​ టన్నుల సీఎంఆర్​ను అందించాల్సి ఉండగా, 53,399.353 మెట్రిక్​ టన్నులు అందించారు.

Also Read :- ధరణి ఇక భూభారతి.. ప్రతి కమతానికి భూధార్ నంబర్

98.39 శాతం సేకరణ జరుగగా, మరో 874.013 మెట్రిక్​ టన్నులు ఇస్తే పూర్తి స్థాయి టార్గెట్​ చేరుకోనున్నారు. 2023-–24 యాసంగి సీజన్​లో 1,42,806.160 మెట్రిక్​ టన్నుల ధాన్యం మిల్లులకు పంపారు. దీనికి 96,989.808 మెట్రిక్​ టన్నుల సీఎంఆర్​ అందించాల్సి ఉండగా, 78,878.990 మెట్రిక్​ టన్నులు అందించారు. మొత్తం 81.33 శాతం సేకరణ జరుగగా మరో 18,110.819 మెట్రిక్​ టన్నుల సీఎంఆర్​ సేకరణ జరుగాల్సి ఉంది.  

బకాయిల వసూళ్లకు చర్యలు 

దేవరుప్పుల మండలంలోని సాయిరాం మెడ్రన్​ బిన్నీ రైస్​ మిల్లు యాజమాన్యం రూ.5,67,46, 429 విలువైన సీఎంఆర్​ అందించాల్సి ఉంది. రికవరీకి ఆదేశాలిచ్చాం. సదరు మిల్లర్​ పై క్రిమినల్​ కేసు పెట్టినా స్పందించడం లేదు. కలెక్టర్​ ఆదేశాల మేరకు వసూళ్ల కోసం చర్యలు వేగవంతం చేస్తాం. రఘునాథపల్లి మండలం కంచనపల్లిలోని మరో మిల్లర్​కూడా సీఎంఆర్​ ఇచ్చేందుకు మొండికేస్తున్నారు. అతడిపై కూడా చర్యలు చేపడుతాం.- వీ హథీరామ్​, సివిల్​ సప్లై డీఎం, జనగామ