మహారాష్ట్రలో ఘోర రోడ్డు ప్రమాదం జరిగింది. ఛత్రపతి శంభాజీనగర్ జిల్లాలోని వైజాపూర్ ప్రాంతంలో సమృద్ధి ఎక్స్ ప్రెస్ వేపై వేగంగా దూసుకొచ్చిన ఓ ప్రైవేటు మినీ బస్సు అదుపుతప్పి కంటైనర్ ను ఢీకొట్టింది. ఈ ఘటనలో బస్సులో ప్రయాణిస్తున్న వారిలో 12 మంది అక్కడికక్కడే ప్రాణాలు కోల్పోగా, మరో 23 మంది తీవ్రంగా గాయపడ్డారు. సమాచారం అందుకున్న పోలీసులు హుటాహుటినా సంఘటనాస్థలానికి చేరుకుని సహాయక చర్యలు చేపట్టారు. క్షతగాత్రులను చికిత్స నిమిత్తం ప్రభుత్వం ఆస్పత్రికి తరలించారు.
ఈ ఘటన 2023 అక్టోబర్ 15వ తేదీ ఆదివారం అర్థరాత్రి 12.30 గంటల సమయంలో చోటుచేసుకున్నట్లు పోలీసులు తెలిపారు. ప్రమాద సమయంలో బస్సులో 35 ప్రయాణికులు ఉన్నారని.. మృతి చెందిన వారిలో ఐదుగురు పురుషులున, ఆరుగురు మహిళలతోపాటు ఓ చిన్నారి కూడా ఉన్నట్లు పోలీసులు పేర్కొన్నారు. ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు తెలిపారు.
