విద్యా, వైద్యానికి ప్రయారిటీ : మంత్రి దామోదర రాజనర్సింహ

• పాలమూరులో స్టేట్​లెవల్​ సైన్స్​ ఫెయిర్​ ప్రారంభం

మహబూబ్​నగర్, వెలుగు : రాష్ట్ర ప్రభుత్వం విద్య, వైద్యానికి ప్రయారిటీ ఇస్తోందని వైద్య, ఆరోగ్య శాఖ మంత్రి దామోదర రాజనర్సింహ తెలిపారు. స్టూడెంట్లలో దాగి ఉన్న సృజనాత్మకమైన ఆలోచనలను ప్రోత్సహించాలని టీచర్లు, పేరెంట్స్​కు సూచించారు. మహబూబ్​నగర్​ జిల్లా జడ్చర్ల మండలం పోలేపల్లి సెజ్​లోని ఎస్వీకేఎం స్కూల్​లో రాష్ట్ర స్థాయి సైన్స్​ ఫెయిర్ ను పిల్లలతో కలిసి ఆయన ప్రారంభించారు. అంతకుముందు 33 జిల్లాల నుంచి వచ్చిన స్టూడెంట్లు ప్రదర్శించిన 861 ప్రాజెక్టులను పరిశీలించారు.

వాటి పనితీరును అడిగి తెలుసుకున్నారు. ఈ సందర్భంగా మంత్రి మాట్లాడుతూ ఆలోచనలతోనే ఆవిష్కరణలు పుట్టుకొస్తాయని పేర్కొన్నారు. వాటికి పదును పెట్టి నేషనల్​ లెవల్​లో స్టూడెంట్లు రాణించేలా టీచర్లు తమవంతు కృషి చేయాలన్నారు. ప్రభుత్వం గురుకులాలతో పాటు సర్కారు బడుల్లో మెరుగైన సౌలతులు కల్పిస్తోందని తెలిపారు. స్టూడెంట్లు అంతర్జాతీయ స్థాయికి ఎదిగేలా ప్రభుత్వం ఉన్నత ప్రమాణాలతో కూడిన ఎడ్యుకేషన్​ను అందిస్తోందన్నారు. స్టూడెంట్లకు చదువుతో పాటు సంస్కారాన్ని నేర్పించాలన్నారు.

పిల్లల ఆవిష్కరణలు అబ్బురపరిచాయని హర్షం వ్యక్తం చేశారు. జడ్చర్ల ఎమ్మెల్యే జనంపల్లి అనిరుధ్​రెడ్డి మాట్లాడుతూ సైంటిస్టుల ప్రదర్శనలు భవిష్యత్  తెలంగాణకు దిక్చూచి కావాలని ఆకాంక్షించారు. మాజీ రాష్ట్రపతి అబ్దుల్ కలాం చెప్పినట్లు ‘కలలు కనాలి వాటిని సాకారం చేసుకోవాలి’ అని అన్నారు. అనంతరం మహబూబ్​నగర్ ఎమ్మెల్యే యెన్నం శ్రీనివాస్​రెడ్డి ఆధ్వర్యంలో టెన్త్​ స్టూడెంట్ల కోసం రూపొందించిన డిజిటల్​ కంటెంట్​ బుక్​ను మంత్రి ఆవిష్కరించారు.

విద్యా శాఖ డైరెక్టర్​ నరసింహారెడ్డి, కలెక్టర్​ విజయేందిర బోయి, ఎమ్మెల్సీ ఏవీఎన్​ రెడ్డి, ఎమ్మెల్యేలు జి.మధుసూదర్​ రెడ్డి, వాకిటి శ్రీహరి, మైనార్టీ కార్పొరేషన్  చైర్మన్  ఒబేదుల్లా కొత్వాల్, లైబ్రరీ చైర్మన్  మల్లు నర్సింహారెడ్డి, ముడా చైర్మన్  లక్ష్మణ్  యాదవ్, ఎస్పీ డి.జానకి పాల్గొన్నారు.